Sýretterdi «Visit Zhetysu» týrstik aqparattyq ortalyǵy usyndy
Jalpy, qulandar popýlıasııasynyń kóp bóligi osy aımaqqa tıesili, 3 600-deı qulan Kerbulaq aýdanynyń «Altynemel» ulttyq tabıǵı parkiniń aýmaǵyn meken etedi. Týrıster osy ásem jaratylysty kórýge arnaıy keledi. О́ńir ákiminiń baspasóz qyzmetiniń málimetinshe, ótken jyly saıabaqqa 24 myńnan asa adam taban tiregen, sonyń 7 myńy – alys-jaqyn shetelden kelgen qonaqtar.
Saıabaqtyń taǵy bir tabıǵı tylsymy – Aıǵaıqum. 10-12 myń jyl buryn paıda bolǵan uzyndyǵy 3 km, bıiktigi 150 metr qum jotasy saıabaqtyń aıryqsha belgisi ispettes, Jetisý ólkesiniń tabıǵı keremetteriniń biri.
«Munda kelýshilerge qulandardy, qaraquıryqtardy, sáti kelse saıabaqtyń basqa da erekshe janýarlaryn tamashalaýǵa arnalǵan foto, beıne safarı uıymdastyrylady. Munyń bári ekologııalyq týrızmdi damytýǵa yqpal etedi, óıtkeni ulttyq parkter Jetisý oblysyndaǵy 5 týrıstik baǵyttyń biri», deıdi «Visit Zhetysu» týrıstik aqparattyq ortalyǵynyń jetekshisi Jandos Nurıev.
Saıabaq qyzmetshileriniń barlyq tynys-tirshiligi «Qyzyl kitapqa» engen janýarlardy, sonyń ishinde qulandardy saqtap qalýǵa baǵyttalǵan. Birshama jyl buryn munda Túrikmenstannan 30-ǵa jýyq qulan ákelingen, qazir qulandar sany edáýir kóbeıdi. Mysaly, 2023 jyly saıabaq aýmaǵyn 3 myńǵa jýyq qulan mekendese, byltyr olardyń sany 3 600-ge jetti. Bul bıologııalyq túrdiń bir bóligi ulttyq parkten basqa aımaqtarǵa da taralyp jatyr.
«Janýarlar popýlıasııasynyń kóbeıýine, saıabaqtyń damýyna, týrıster sanynyń artýyna memleket tarapynan qoldaý kórsetilip keledi. Qaýipsizdikti jaqsartý maqsatynda 14 jańa motosıkl men motorly qaıyq, 10 traktor, qarda júretin kólikter, dron satyp alyndy. Drondy túnde de ushyrýǵa bolady. Jol ınfraqurylymyn jaqsartýda oblys ákimdigi tarapynan kórsetiletin qoldaýdyń mańyzy zor. О́tkiziletin ımıdjdik is-sharalar arqyly týrısterdi kóptep tarta bastadyq. Munyń bári saıabaqtyń damýyna, faýna men floranyń saqtalýyna oń áserin tıgizip otyr», deıdi «Altynemel» memlekettik ulttyq tabıǵı parkiniń bas dırektory Qýat Baıturbaev.
Ulttyq parktiń jalpy aýmaǵy 307 myń gektardan asady. Biregeı tabıǵatyn, sırek kezdesetin janýarlaryn, tarıhı-mádenı mura eskertkishterin saqtaý úshin «Altynemel» IýNESKO bıosferalyq rezervatynyń halyqaralyq mártebesin ıelengen. Munda sırek kezdesetin ósimdikterdiń 31 túri, Qazaqstannyń «Qyzyl kitabyna», halyqaralyq tabıǵatty qorǵaý odaǵynyń Qyzyl tizimine engizilgen janýarlardyń 66 túri kezdesedi. Sonyń ishinde barys, qulan, qaraquıryq, t.b. bar. Taýly jerlerge qońyr aıýdyń kelgeni de baıqalǵan. Ulttyq saıabaq biregeı tabıǵı nysandarymen de tanymal. Olardyń qatarynda Aıǵaıqum, Aqtaý bor taýlary, Qatýtaý shóldi lava taýlary, 700 jyldyq tal, Besshatyr saq qorǵandary, Tańbaly tas petroglıfteri bar. Týrıster osy biregeı tabıǵı nysandardy da tamashalaı alady.
«Qazir Qazaqstan kórkem tabıǵatynyń arqasynda Úndistanda jaqsy tanymal. Biz Shymbulaqta, Kólsaı, Qaıyńdy kólderiniń jaǵasynda boldyq, Endi «Altynemel» ulttyq saıabaǵy men Aıǵaıqumnyń tamashasyn kózben kórip, zerttep-bilip jatyrmyz. Áserimizdi sózben aıtyp jetkizý múmkin emes», deıdi Úndistannan kelgen týrıst Nambýtaseha.
Byltyr jol ınfraqurylymyn jaqsartý maqsatynda respýblıkalyq mańyzy bar «Saryózek – Kóktal» jolynyń uzyndyǵy 23 shaqyrym bolatyn Altynemel asýyndaǵy ýchaskesine kúrdeli jóndeý júrgizildi.
«Men munda alǵash ret 5 jyl buryn otbasymmen birge kelgenmin. Sońǵy kelgenimde Aıǵaıqumnyń «ánin» estı almaı kettim. Biraq bul joly jolym bolyp, qumnyń daýysyn estidim. Onyń bıigine shyqqandaǵy áser múlde bólek. Múlgigen tynyshtyq, záý bıikten qaraǵandaǵy kórinis tipti ǵajap», deıdi Almatydan kelgen jas týrıst Renata Lınnık.
«Altynemel» ulttyq saıabaǵy syrttan kelgen qonaqtarǵa taptyrmas rýhanı olja. Oblysta ekologııalyq týrızmniń damýyna da sep. Saıabaq basshylyǵy, oblys ákimdigi, «Visit Zhetysu» týrıstik aqparattyq ortalyǵy bul baǵyttaǵy jumystardy júıeli túrde jalǵastyra beretin bolady.
Jetisý oblysy
