Sýretti túsirgen – Jumabaı MUSABEKOV
Qaratal topyraǵyna baryp «Shakıra Nurjumanqyzy» deseńiz, jurtshylyq «Álgi traktor júrgizgen Shakıra ǵoı» dep, birden tanıdy. Bul múmkin búginde jeńil avtokólikti tizgindep júrgen kópshilik qyz-kelinshekterge tańsyq bolar. Biraq ótken ǵasyrdyń orta shenindegi áıel-analar jastaıynan aýyr tehnıkaǵa otyryp, eńbektiń naq úlgisin kórsete bildi.
Shakıra Nurjumanqyzy Qaratal aýdany, Kálpe ujymshary, Kırov taýarly sút bólimshesinde kópbalaly qarapaıym otbasynda dúnıege kelgen. Bir otbasynda 10 bala tárbıelenip ósken. Ákesi Nurjuman sol aýyldaǵy sút fermasynda birneshe jyl mal dárigeri bolyp qyzmet atqarǵan. Anasy bolsa sol fermada 40 jyldan astam ýaqyt boıy saýynshy bolyp eńbek etken. Eki eńbek adamynyń tárbıesin kórgen jannyń er adamǵa bergisiz qareketke barýy qaıran qaldyrady.
«Bizdiń zamannyń bet-beınesi betimizge túsken ájimmen ólshense kerek. Áke-sheshemizdiń eteginde júrip, tirlikke erte aralastyq. Zaman qıyn, eńbek etseńiz ǵana elden qalmaısyz. Sıyr saýdyq, jer jyrttyq, egin ektik, qolymyzdan ne keledi, bárin atqardyq. Ol ýaqytta myna jumys unamaıdy, myna jumys unaıdy degen sóz joq. Berilgen tapsyrmany oryndaýǵa mindettisiń. Sóıtip júrip jetildik. Qazir qarap otyrsańyz, bári ertegi sekildi», deıdi keıipkerimiz.
Bala kúninde sút fermaǵa baryp analarymen birge sıyr saýǵan. Mektepten tys ýaqytynda sol áke-sheshesi eńbek etetin zaýytty jaǵalaǵan. Ákelerine ilesip, malǵa jemshóp berip, kómektesip te júrgen. Úıdiń úlkeniniń biri bolǵandyqtan, ózinen keıingi baýyrlaryna qamqorlyq tanytyp, qadaǵalap otyrǵan. Olardyń kirin jýyp, tamaǵyn istep, jumystan qoly bosaı bermeıtin anasyna qolǵabys etken.
Jazǵy demalys kezinde Kálpe ujymsharynyń egistik alqabyna baryp, qant qyzylshasynyń aram shóbin shaýyp, mektepke barar kıim-keshegin satyp alǵan. Bala kezden osyndaı aýyl sharýalaryna erte aralasqannyń nátıjesinde Kálpe orta mektebin bitirisimen, 17 jasynda osy keńsharda saýynshy bolyp eńbek jolyn bastady. Eńbeksúıgishtiginiń arqasynda úsh aılyq mehanızatorlyq kýrsty bitirip aldy. Qolyna qujatyn alǵan bette birden MTZ-40 traktoryna otyryp, eńbek jolyn mehanızator bolyp jalǵastyrdy.
«Ol kezde keńsharda tórt qyzdan qurylǵan «Qarlyǵash» atty komsomol jastary mehanızatorlar brıgadasy bolatyn. Men osy brıgadaǵa besinshi bolyp qabyldandym. Brıgada músheleri ishinde aýyldaǵy Qutjan Baıgózova, Baqyt Sadazbaeva bar edi. Partııa qataryna óttim. Kálpe ujymshary Kırov aýyldyq okrýgine eki márte depýtat bolyp saılandym. Aýdanda eńbek ozattary qataryna ilinip, aýdan, oblys ákimshiliginiń birneshe alǵyshattary, maqtaý gramotasy, dıplomdarymen marapattaldym. Eren eńbegimiz jóninde oblystyq, aýdandyq gazetterde birneshe maqala jarııalandy. Eńbek ozaty retinde oblys, aýdan ákimshiliginiń aldyndaǵy eńbek ozattary taqtasyna sýretimiz ilindi», dep eske alady ózi sol bir aıaýly sátterdi.
Kálpe ujymsharynda Aıdar taýarly sút bólimshesinde turatyn Asylhan esimdi azamatpen otbasyn quryp, tórt balanyń anasy atandy. Otbasylyq ómirimen ǵana shektelip qalmaı, aýyldaǵy túrli sharýashylyq jumystarǵa da belsene aralasyp turdy. Kórshi aýylda «Jaǵatal» asyl tuqymdy qus fermasy ashylyp, eńbek jolyn sol óndiris ornynda brıgadır bolyp jalǵastyrýdy júregi qalady. Keıin Taldyqorǵan qalasyndaǵy zootehnıkalyq tehnıkýmyn bitirip, sút fermasynda birneshe jyl tehnık-osemenator bolyp jumys istedi.
«Uıada ne kórseń, ushqanda sony ilersiń» demekshi, uldarym da bizdiń jolymyzdy qýyp aýyl sharýashylyǵynda eńbek etip jatyr. Aıdos eki qyz tárbıelep otyr, Eldostyń úsh qyzy bar. Kelinderim mádenıet salasynda qyzmet isteıdi. Qyzym Gúlmıra turmysta, ul-qyz ósirip otyrǵan ana. Oblys ortalyǵyndaǵy №24 mektep-lıseıde aqparattaný pániniń muǵalimi», deıdi Shakıra apa.
2000 jyly otbasymen jeke sharýa qojalyǵyn qurǵan. Búginde sol qojalyqqa basshylyq jasap otyr. Joldasy Asylhan, uldary Aıdos pen Eldostyń qoldaýymen sharýashylyqty keńeıtip jatyr. Keıingi jyldary qosymsha qant qyzylshasyn ósirýdi qolǵa alǵan. Jyl saıyn 19 gektar sýarmaly jerdiń ár gektarynan 70-80 tonnadan tátti túbir alady.
Jetisý oblysy
