Aýylda ósken Baǵdat kishkentaı kezinen tabıǵatqa, ósimdikterge qyzyqqan. Keıinnen M.V.Lomonosov atyndaǵy Máskeý memlekettik ýnıversıtetiniń topyraqtaný fakýltetine oqýǵa túsip, ony úzdik aıaqtaǵan.
«Ýnıversıtette júrgenimde-aq landshaft dızaınyna erekshe qyzyǵatynmyn. Dalalyq tájirıbe kezinde tabıǵattyń ózindik úılesimin baqylaý qııalyma qanat bitirdi. О́ıtkeni tabıǵat túster men formalardy tamasha úılestiredi», deıdi.
Jubaıynyń jumysyna baılanysty Londonǵa qonys aýdarǵan kezde Baǵdat ózine tanys salada jumys isteımin dep sheshedi. Gúl kompanııasyna qyzmetke ornalasyp, brıtandyq gúl naryǵyn tereńirek zertteı bastaıdy. Bir jyl ótken soń óz bıznesin bastaýǵa bel býǵan:
«Barlyǵyn nólden bastadym. Alǵashqy ınvestısııam birneshe myń fýnt qana boldy. Ol qarjy keńse jaldaýǵa, kómekshilerdiń jalaqysyna, qural-jabdyqtar men alǵashqy tapsyrystarǵa arnalǵan gúlder men materıaldardy satyp alýǵa ketti».
Ol alǵashqy kúnnen-aq joǵary sapa men daralyqty basty nazarǵa aldy. London naryǵynda básekelestik joǵary bolǵanymen, klıentterdiń qalaýyn dál oryndaý ári qyzmet kórsetý sapasyn arttyrý arqyly tabysqa jetýge bolatynyn túsindi.
«Klıentterimiz gúl shoqtaryn meıramhanaǵa belgilengen ýaqytta nemese tipti tún ortasynda úıge jetkizýdi suraıdy. Londonda mundaı qyzmet sırek kezdesetindikten, biz bul baǵytta senimdilik qalyptastyrdyq. Alǵashqy jylymyzdyń qorytyndysy boıynsha salyq esebinde paıda kórsettik. Jyl saıyn tabysymyzdy 30-35%-ǵa arttyrýdy josparlap otyrmyz», deıdi Baǵdat.
Onyń kompanııasynda gúl shoqtarynyń baǵasy 100 fýnttan bastalady. Klıentteri – jergilikti juldyzdar, tanymal sportshylar men joǵary tabysty adamdar. Gúl satýmen qatar kásipkerdiń kompanııasy sándi is-sharalardy bezendirýmen de aınalysady. Olardyń jobalarynyń arasynda álemdik IT-kompanııalardyń London saraılarynda ótken saltanatty keshteri de bar.
«Bizge XVIII ǵasyrda salynǵan Addıngton saraıynyń úlken zaldaryn bezendirý mártebesi buıyrdy. Bul saraı bir kezderi Anglııanyń Kenterberı arhıepıskoptarynyń rezıdensııasy bolǵan. Osyndaı aýqymdy jobalar tynysymyzdy ashty. Brıtandyqtar tabıǵı kórinisti unatqanymen, London – álemniń túkpir-túkpirinen kelgen túrli mádenıetter toǵysqan qala. Sondyqtan arab, qytaı jáne shyǵys stılindegi gúl shoqtaryn da ázirleımiz. Biz avtorlyq gúl shoqtarymen jumys isteýdi unatamyz. Mysaly, Djeıms Bond stılindegi nemese Tım Berton fılmderiniń sıýjetterine negizdelgen erekshe kompozısııalar jasaımyz», deıdi kásipker.
