Medısına múmkindigin qaryshtatyp otyrǵan osynaý zaqymy az ádis arqyly trombty alyp tastap, «terapııalyq terezeni» keńeıtýge bolady. Dástúrli trombolıtıkalyq terapııamen salystyrǵanda, jańa tásil qaıtyp shıpa qonbaıtyn asqyný qaýpin azaıtady.
Mundaı operasııalar qazir Almaty №4 qalalyq klınıkalyq aýrýhananyń rentgen-endovaskýlıarlyq hırýrgııa bólimshesinde sátti túrde jasalyna bastady.
«Tromboekstraksııa ınsýlt alǵan naýqasqa tolyqqandy ómirge oralýǵa múmkindik beredi. Bul jerde ýaqyt basty ról atqarady: zaqymy tómen hırýrgııalyq ota neǵurlym erte jasalsa, tolyq qalpyna kelý yqtımaldyǵy soǵurlym joǵary bolady. Bizdiń tájirıbemizde jaqsy nátıje bar – ınsýlt saldarynan sal bolyp qalǵan naýqastar birneshe kúnnen keıin ózdiginen júrip, sóıleı aldy», deıdi №4 QKA neırohırýrg dárigeri Aldonǵar Aısaýtov.
Joly bolǵan 39 jastaǵy er adam №4 qalalyq klınıkalyq aýrýhananyń qabyldaý bólimine tili kúrmelip, oń aıaq-qoly álsizdenip, qosarlap kórý sııaqty ınsýlttiń ótkir belgilerimen tústi. Insýlt belgileri anyqtalǵan sátten bastap alty saǵat ishinde neırohırýrgtar mehanıkalyq tromboekstraksııa jasap, naýqastyń mı qyzmetin tolyq qalpyna keltirdi. Bir aptadan keıin naýqas nevrologııalyq asqynýsyz otbasyna oraldy.
«Nevrolog, neırohırýrg jáne reanımatolog dárigerlerdiń úılesimdi jumysynyń arqasynda mehanıkalyq tromboekstraksııa ajaldan qutqarý standartynyń birine aınalyp keledi. Bul ádis talaı naýqasty múgedektikten saqtap, qalypty ómirge oralýyna kómektese alady», deıdi Almatydaǵy №4 QKA Insýlt ortalyǵynyń meńgerýshisi Dınara Muhanǵalıeva.
