Sýret: ortcom.kz
Bizde ekinshi deńgeıli 21 banktiń 10-y avtonesıe beredi. Onyń ishinde halyqqa keńinen qoljetimdi 7 bank belsendi túrde óz qyzmetin usynyp otyr. Avtonesıeni tańdaý kezinde eń mańyzdy kórsetkishterdiń biri – jyldyq tıimdi syıaqy mólsherlemesi (SJTM). Qarjy naryǵyn retteý jáne damytý agenttigi bekitken erejege sáıkes, mundaı nesıede maksımaldy SJTM 35%-dan aspaýǵa tıis. Osy shek aıasynda bankterdiń usynystaryn salystyryp kóreıik.
Eń tómengi mólsherlemeni qaı bank usynady? Áýeli kózge ForteBank tústi. Ol eń tómengi maksımaldy mólsherlemeni usynyp otyr. 25,3%-ǵa deıin. Bul bank arqyly jańa da, qoldanysta bolǵan kólik te satyp alýǵa bolady. Biraq kóliktiń shyqqan jyly 8 jyldan aspaýǵa tıis. Odan keıingi orynǵa Bank SentrKredıt pen Freedom Bank jaıǵasqan. Bul eki bankte maksımaldy SJTM 25,6%-dy quraıdy. Biraq Bank SentrKredıtte mólsherleme tek jańa kólikterge arnalǵan, al qoldanysta bolǵan avtomobılge 32,24%-ǵa deıin kóteriledi. Sonymen qatar bul bankte 22,4%-dyq SJTM-men Skoda markaly avtokólikterge arnalǵan arnaıy usynys bar. Alaıda Skoda bizde asa tanymal emes. Kelesi Halyk Bank – jańa kólik úshin maksımaldy SJTM 28,3%, al qoldanylǵan kólik úshin 30,1%. Al Bereke Bank pen Eýrazııalyq Bank – bul eki bank maksımaldy ruqsat etilgen 35%-dyq SJTM kórsetip otyr. Biraq olardyń avtonesıelerdi jańa jáne qoldanysta bolǵan kólikter úshin de qoljetimdi.
Nesıe somasy men merzimi qandaı? Eldegi avtonesıelerdiń eń uzaq merzimi – 7 jyl. Qarastyrylǵan 7 banktiń altaýy dál osyndaı merzimge nesıe beredi. Nesıege qoljetimdi eń joǵary soma – 18 mln-nan 50 mln teńgege deıin. Bul kórsetkish bankterdiń ishki saıasaty men klıenttiń tólem qabiletine baılanysty ózgerýi múmkin.
2024 jyldyń aqpan aıynyń basynda Qazaqstanda 5,1 mln jeńil kólik tirkelgen, bul ótken jylmen salystyrǵanda 7,6%-ǵa kóp. Alaıda eldegi avtoparktiń edáýir bóligi eski. Mysaly, 1,2 mln kólik – 10 jyldan 20 jylǵa deıin qoldanysta júrgen, 2,2 mln kólik – 20 jyldan astam ýaqyt paıdalanylyp kele jatyr.
