Qanysh Sátbaev atyndaǵy sý arnasy bıyl Shiderti ózeniniń mańaıyn qonys etken eldi mekenderdi barynsha jarylqaıyn dep tur. Tirshilik nári saı-salany sýǵa toltyryp, Aqtoǵaı aýdany men Ekibastuzdyń aýyldyq aımaqtaryndaǵy mal ósirýshi aǵaıynnyń nesibesin eseleı túsedi.
Kanaldan sý bosatý sharalarynyń jalpy uzaqtyǵy shamamen eki aıǵa ulasady. Osy aralyqta jalpy kólemi 120 mln tekshe metr sý Shiderti ózeni arqyly keń dalaǵa jóńkilip, shabyndyq úshin paıdalanylatyn kóltabandardy, Aqkól-Jaıylmadaǵy Áýlıekól kólder júıesin (shamamen 9 kól bar) tolyqtyryp, balyq resýrsyn qalpyna keltirýge oń áserin tıgizedi. Ekinshi turǵydan bul aýmaqtardyń tabıǵı tepe-teńdigin ustap turýǵa, ekologııalyq ahýaldy jaqsartýǵa negizdelgen.
– Bıyl Shiderti ózeniniń jaıylmasyna rekordtyq kólemde sý jiberiledi. Ol shamamen sáýir-mamyr aılarynda júrgizilýi kerek. 2024 jyly bosatylǵan sýdyń kólemi 86,7 mln tekshe metrdi quraǵan edi. Tasqyn sýdyń kedergisiz ótýin qamtamasyz etý maqsatynda ótken jyldyń qazan-qarasha aılarynda Ertis basseındik ınspeksııasymen, tótenshe jaǵdaılar organdarymen jáne jergilikti ózin-ózi basqarý organdarynyń qyzmetkerlerimen birlesip, barlyq gıdrotehnıkalyq qurylysqa komıssııalyq zertteý júrgizildi. Gıdrotehnıkalyq qurylystyń jaǵdaıy qanaǵattanarlyq, – deıdi Sý resýrstary jáne ırrıgasııa mınıstrligi «Qazsýshar» RMK Pavlodar fılıalynyń basshysy Arman Ospanov.
Atap óteıik, «Qazsýshar» mekemesiniń Pavlodardaǵy fılıalyna arnadan bólek, Shiderti saǵalyq sýarý júıesi, Belovod toptyq sý qubyry, Maı toptyq sý qubyry, Ertis júıeli sýarmaly óndiristik ýchaskesi, Qolybaı kóltabandar júıesi qaraıdy. Jaýapty mınıstrlik Memleket basshysynyń tapsyrmasy boıynsha álemde teńdesi joq gıdrotehnıkalyq qurylysty keshendi jańǵyrtýdyń Jol kartasyn ázirledi. Aldaǵy tórt jylda Sátbaev arnasynda 19 sýsorǵy agregaty men elektr jabdyqtaryn aýystyrý josparlanǵan.
«Halyq sanynyń artýyna, óndiristik kásiporyndardyń kóbeıýine baılanysty arnanyń sý resýrstaryna suranys ulǵaıyp keledi. Memleket basshysynyń tapsyrmasyn iske asyrý aıasynda bıyl mınıstrlik Q.Sátbaev atyndaǵy arnany keshendi jańǵyrtý jumysyn bastaıdy. Jol kartasyna sáıkes arnany 2028 jylǵa deıin 19 sýsorǵy agregaty men elektr jabdyqtaryn jańartamyz. Osynyń nátıjesine sýmen qamtý sapasyn arttyryp, kanaldy uzaq merzim, qaýipsiz paıdalanýdy qamtamasyz etkimiz keledi», deıdi Sý resýrstary jáne ırrıgasııa vıse-mınıstri Erbolat Ibraıhanov.
Jalpy, keıingi jyldary Sátbaev arnasynyń jaǵdaıy keri ketip qalǵanyn buǵan deıin gazet betinde birneshe ret másele etip kótergenbiz. «Qazsýshar» RMK onyń jyldyq tabysynan 2 mlrd teńgeni jyryp alyp, elimizdiń ózge aýmaqtaryndaǵy ınvestısııalyq jobalarǵa jumsap jatqanyn, saldarynan arnanyń qarjylyq ahýaly nasharlap ketkenin kásiporyn ókilderi aıtýdaı-aq aıtyp keledi. Arna Pavlodar oblysynyń Maı aýdanyndaǵy Belaıa ózeninen bastalyp, Qaraǵandyǵa deıin jalǵasady. Uzyndyǵy – 459 shaqyrym, sonyń 380-deı shaqyrymy Pavlodar oblysynyń aýmaǵynda ornalasqan. Sý torabynyń biregeıligi sol, 22 sýsorǵy stansalary sýdy tómennen joǵaryǵa qaraı aıdap, jalpy bıiktigi 418 metrge deıin kóteredi. Mundaı sý arterııasy jer betinde joq. Sýsorǵy-qýat jabdyqtary jylyna shamamen 2200 mln kVt/saǵat elektr energııasyn tutynatyndyqtan, arnanyń ekinshi kezegi – «Qaraǵandy – Jezqazǵan» baǵyty júrgizilmedi. Iаǵnı sol tustaǵy mamandar muny tıimdi emes dep eseptedi. Sonyń áserinen kanal búginde óz áleýetiniń tek 40%-yn ǵana paıdalanady. Resmı málimetterge súıensek, jylyna tutynýshylar arnadan 450-460 mln tekshe metr sý satyp alyp otyr. Kanal Qaraǵandy, Pavlodar oblystary men Astana qalasyn aýyzsýmen qamtamasyz etedi. Atalǵan úsh óńirdegi iri óndiris oryndary, sharýashylyqtar arna sýyn paıdalanady.
Pavlodar oblysy
