Mańyzdy taqyrypqa arnalǵan jıynǵa «Egemen Qazaqstan» jáne «Kazahstankaıa pravda» basylymdarynyń ujymy qatysty.
Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa áıelder men balalardyń quqyqtaryn qorǵaý salasyndaǵy ózekti máselelerdi sheshýge árkez múddeli. Búginde Mádenıet jáne aqparat mınıstri Aıda Balaeva tóraǵalyq etetin komıssııa qoǵamnyń ár satysynda áıelderdiń únin bıik minberge jetkizý baǵytynda qyzmet atqaryp keledi.
Onyń ishinde názik jandylardyń laýazymdyq qyzmettegi úlesin arttyrý, qoǵamdaǵy bedelin bıiktetý, eńbek naryǵyndaǵy paıyzdyq úlesin joǵarylatý, er men áıel jalaqysynyń teń deńgeıde eseptelýine muryndyq bolý syndy mańyzdy máseleler bar.
Tarasenko Elena Ivanovna búgingi jıynda elimizdegi er men áıel quqyǵy Konstıtýsııamen teńestirilgenine nazar aýdaryp, bul taqyryptaǵy teńdik otbasynan bastalatynyn atap ótti.
«Er men áıel teńdigi otbasyndaǵy tárbıeden bastaý alady. Memlekettiń osy bir mańyzdy ınstıtýtynda teńdik tereń túsindirilse qoǵamda keleńsiz túsinikter qalyptaspaıdy. Tıisinshe osyndaı otbasylarda ósip-óngen balalar genderlik stereotıpterdi joıýǵa at salysady. Komıssııa maqsaty da osy tustan bastaý alyp, memlekettik deńgeıge ulasady. Osyndaı nátıjeli qadamdar arqyly sheshýshi qyzmetter men memlekettik organdarda áıelderdiń sany artyp keledi. Máselen 2004 jyldary áıel depýtattardyń parlamenttegi úlesi 10 paıyz bolsa, 2019 jyly 20 paıyzǵa jetken. 2020 jyly bul kórsetkish 28 paıyzdy qurady», dedi Elena Ivanovna.
Keńestik kezeńde 200-ge jýyq mamandyqta áıelderdiń eńbek etýine tyıym salynǵany belgili. Búginde elimizde mundaı shekteýlerdiń taby qalmaǵan. Munyń ózi Qazaqstanda genderlik saıasattyń damýyna erekshe den qoıylyp jatqanyn ańǵartady.
