Nekelesýdiń jalpy koeffısıenti 6,13 qurady (1000 adamǵa). Nekeleskenderdiń kópshiligi Astana qalasynda, 1000 adamǵa shaqqanda 7,34 neke koeffısıenti, sondaı-aq Almaty (6,98) jáne Ulytaý oblystarynda (6,70) baıqaldy. Nekege turýdyń eń tómengi deńgeıi Batys Qazaqstan oblysynda – 1000 adamǵa shaqqanda 5,58 neke tirkelgen.
Otbasyn qurǵandardyń ishin erlerdiń 78% jáne áıelderdiń 79,1% nekege alǵash ret turǵan, ajyrasqannan keıin qaıta úılengen erlerdiń úlesi – 20,8%, turmysqa shyqqan áıelderde –19,4%.
«Qalalyq jerlerde 82,1 myń neke (66,4%), aýyldyq jerlerde 41,5 myń neke (33,6%) tirkelgen. Alǵash neke qurǵan erlerdiń ortasha jasy 27,9 jas bolsa, áıelder úshin – 25,2 jas. 2024 jyly neke jaz aılarynda eń kóp tirkelgen: maýsym – 11 675, shilde – 13 739, tamyz – 12 936 birlik», - delingen USB habarlamasynda.
Barlyq tirkelgen nekeniń 81,8% monoetnıkalyq bolsa, qalǵan 18,2% – etnosaralyq.
«Ajyrasýǵa keletin bolsaq, 2024 jyly olardyń sany 40,5 myń boldy. Qalalyq jerlerde 30,1 myń ajyrasý (74,4%), aýyldyq jerlerde – 10,4 myń ajyrasý (25,6%) tirkelgen. Ajyrasýdyń jalpy koeffısıenti 2,01 qurady (1000 adamǵa)», - delingen habarlamada.
Ajyrasýdyń eń joǵary deńgeıi ShQO-da, 1000 adamǵa shaqqanda 3,12 koeffısıentimen, sondaı-aq Qaraǵandy (3,11) jáne Pavlodar (3,09) oblystarynda baıqaldy. Ajyrasýdyń eń tómengi deńgeıi Túrkistan oblysynda – 1000 adamǵa shaqqanda 0,90.
Neke uzaqtyǵy boıynsha ajyrasýlardyń eń kóp úlesi (35%) 1-4 jyl nekede turǵan otbasylar arasynda, ajyrasýlardyń 25% – 5 jyldan 9 jylǵa deıin birge turǵandar arasynda, taǵy 8% neke tirkelgennen keıin bir jyl ishinde ajyrasqan.
