Foto: Áleýmettik medısınalyq saqtandyrý qory KEAQ baspasóz qyzmeti (arhıv)
Máselen, 2025 jyly Almaty qalasynda MÁMS paketi sheńberindegi reabılıtasııalyq qyzmetterge 8 mlrd teńgege jýyq qarjy qarastyrylǵan. Sonymen saqtandyrý arqyly medısınalyq ońaltýdan kimder óte alady? Reabılıtasııadan ótý joldary qandaı? Osy jáne ózge de saýaldarǵa Medısınalyq saqtandyrý qorynyń Almaty fılıaly ókilderi tómendegideı jaýap berdi.
Medısınalyq ońaltý qyzmetin qandaı klınıkalar kórsetedi?
2025 jyly Almatyda 81 uıym medısınalyq ońaltý qyzmetin kórsetýge tapsyrys aldy. Bul tizimge engen emhanalar, aýrýhanalar, jeke menshik medısına ortalyqtary, ońaltý jáne sporttyq-ońaltý keshenderi, shıpajaı keshenderi, medısınalyq-áleýmettik mekemeler, emdeý-saýyqtyrý keshenderi bar. Tizimmen Qordyń msqory.kz resmı saıty arqyly tanysýǵa bolady.
Medısınalyq ońaltý kimderge kórsetiledi?
Reabılıtasııadan:
- negizgi nemese sozylmaly aýrýdy emdeý qajet bolǵanda;
- ınsýlt t.b. syndy aýyr naýqastardan keıin;
- keıbir hırýrgııalyq operasııalardan keıin;
- jaraqat alǵannan keıin;
- syrqat saldarynan adamnyń qımyl-qozǵalysy shektelgen jaǵdaılarda ótýge bolady.
Buryn ońaltýdan ótip kórmegen pasıent neden bastaǵany jón?
Kez kelgen pasıent medısınalyq qyzmetke júginý úshin eń aldymen tirkelgen emhanasyna barady.
Emdeýshi dáriger reabılıtolog mamannan nemese mýltıdıssıplınarlyq top mamandarynan konsýltasııa alýǵa jiberedi.
Mamandar derttiń paıda bolýy men meńdeýin, syrqattyń densaýlyq jaǵdaıyna baılanysty málimetterdi eskere otyryp, ońaltýǵa degen qajettilik bar-joǵyn aıqyndaıdy. Bastapqy reabılıtasııalyq dıagnoz qoıyp, pasıent densaýlyǵyn qalpyna keltirý josparyn, kýrstyń merzimin t.b. anyqtaıdy.
Eger keshendi tekserý nátıjesinde reabılıtasııa tıimdi dep tabylsa, pasıent ońaltýdan ambýlatorııada, stasıonarda, stasıonardy almastyratyn emdeý mekemesinde, úıde óte alady. Josparly túrde em qabyldaıtyn pasıent stasıonarǵa «Aýrýhanaǵa jatqyzý bıýrosy» portaly arqyly jatqyzylady.
Medısınalyq ońaltý úsh kezeńnen turady
Birinshisi aýrýy asqynyp turǵan naýqastarǵa, hırýrgııalyq operasııa jasatqan, jaraqat alǵan adamdarǵa arnalǵan. Ol stasıonarlardyń qurylymdyq bólimshelerinde júrgiziledi.
Eger aýrýhanaǵa jatqyzý qajet bolmasa, medısınalyq kómek kórsetilgennen keıin jáne negizgi aýrý emdelip bolǵannan keıin pasıent ońaltýdyń ekinshi nemese úshinshi kezeńine jiberiledi.
Ońaltýdyń ekinshi kezeńi mamandandyrylǵan bólimshelerde nemese respýblıkalyq densaýlyq saqtaý uıymdary, mamandandyrylǵan ońaltý ortalyqtary men kópbeıindi stasıonarlar bazasynda ótedi. Bul kezeń aýrý bastalǵan sátten bastap alty aı ishinde júrgizý qajet.
Úshinshi kezeńde medısınalyq ońaltý emhana-ambýlatorııa deńgeıinde, kúndizgi jáne táýlik boıǵy stasıonarlarda, ońaltý ortalyqtarynda, sanatorııler men kýrorttarda, úıdegi stasıonar jaǵdaıynda, sondaı-aq qashyqtyqtan júrgiziledi.
ALMATY
