Oblys ortalyǵynda áýeli 80-nen astam bala alǵash qaz bassa, qalǵan balalardyń sol ýaqytta aýdan-aýdandarda tusaýy kesildi. О́zge eldi mekenderdegi rásimdi qala halqy onlaın túrde tamashalady. Merekelik jıyn Qydyr ata keıpindegi qarııanyń kópke bata berýimen bastaldy. Osy kúni Kerbulaq, Kóksý, Qaratal, Eskeldi, Alakól, Sarqan aýdandarynda 30 baladan, Aqsý aýdany men Tekeli qalasynda 20 baladan – jalpy sany 336 balanyń qýanyshyna el kýá boldy. Tusaýkesý rásimin balalardyń joly ashyq, qadamy nyq, ómiri uzaq bolsyn degen nıetpen kópke syıly ardagerler, óner qaıratkerleri, qalamgerler, jýrnalıster, dárigerler, memlekettik qyzmetshiler, kásipkerler, qoǵamdyq birlestik ókilderi, t.b. atqardy.
«Elimizde úsh júzden astam balanyń tusaýyn bir mezgilde kesý alǵash ret Jetisý oblysynda ótkizilip otyr. Sondyqtan bul fakt Qazaqstannyń rekordtar kitabyna engizildi», degen rekordtardy tirkeý komıssııasynyń múshesi Baqytjan Tastúlekov uıymdastyrýshylarǵa arnaıy sertıfıkat usyndy.
Kópbalaly ana, úshemderdi ómirge ákelgen Senbaı Tursynbek te osy merekede sábıleriniń tusaýyn keskizýge arnaıy alyp keldi. Alǵashqy qadamyn jasaǵan baldyrǵandardyń tusaýyn bilim berý salasynyń úzdigi, 40 jylǵa jýyq tájirıbesi bar ınjener-pedagog Áset Jumadilov kesti.
«Otbasynda alty balamyz bar, tuńǵyshymyz Daryn 13 jasta, ol da búgin menimen birge keldi. Kúıeýim aspaz bolyp jumys isteıdi. Búgin osy mereke kúni úsh kishkentaıym – Darhan, Dıana, Darııanyń tusaýyn keskizdim. Bul rásimniń dál Naýryz kúnderinde atqarylǵanyn jaqsy yrymǵa balap otyrmyn. Balalarymnyń aldaǵy bolashaq joly úshin jaqsy bir belgi dep sanaımyn», dedi ol.
Osy kúni Naýryzbaevtar otbasy da qýanyshqa kenelip, 22 naýryzda bir jasqa tolatyn kishkentaı Inaıattyń tusaýy kesildi:
«Tuńǵysh balamyzdyń osyndaı saltanatty jaǵdaıda alǵashqy qadamyn jasaǵanyna qatty qýanyp turmyz. Jastardyń ulttyq dástúrlerimizdi saqtap, ony ustanýǵa belsendi qatysqanyn qoshtaımyn», deıdi Inaıattyń anasy Dıana Álimbek.
Al bul kúni Qaratal aýdanynda tusaýy kesilgen 30 balaǵa baıǵazy retinde qozy berildi. Qýanysh áserimen bólisken kópbalaly ana, «Altyn alqa» ıegeri Lıda Janbota:
«Bizdiń otbasymyz úshin búgin qýanysh, qyzymyz alǵashqy qadamyn jasady. Naýryz merekesimen, Qasıetti Ramazan aıymen tuspa-tus kelgen jaqsylyqqa áýletimiz erekshe qýanyp otyr. Uıymdastyrýshylarǵa úlken rahmet. Búgin qyzyma syıǵa tartylǵan kishkentaı qozysy endi ózimen birge shapqylap oınap ósetin boldy», dep uıymdastyrýshylarǵa alǵysyn jaýdyrdy.
Jetisý oblysy
