Kollajdy jasaǵan – Záýresh SMAǴUL ,«EQ»
2021 jyldan beri Prezıdent óziniń Qazaqstan halqyna Joldaýynda el ekonomıkasyndaǵy osy sektordyń úlesin arttyrýdyń mańyzyn birneshe ret atap ótken bolatyn.
Osyǵan oraı Respýblıkada arnaıy jobalyq keńse jumys isteıdi, salany damytý tujyrymdamasy da qabyldanǵan. Ony ınstıtýsıonaldyq turǵyda qalyptastyrý jáne saladaǵy bıznesti yntalandyrý boıynsha jumys júrgizilgen.
«Búgingi tańda Qazaqstandaǵy kreatıvti ındýstrııa 12 baǵyt boıynsha damyp, 43 ekonomıkalyq qyzmet jikteýishi túrin qamtıdy. Qazaqstanda kreatıvti ındýstrııamen aınalysatyn tirkelgen sýbektileriniń sany 45,5 myńnan asady, elimizdiń JIО́-degi jalpy qosylǵan qunnyń úlesi 1%-dy quraıdy. Barlyq sýbektiniń 50%-dan astamy Almaty men Astanada shoǵyrlanǵan, olardyń 70%-y jeke kásipkerler», dedi Aıda Balaeva.
Elimizdiń kreatıvti sektorlarynda barlyǵy 143,6 myń adam jumyspen qamtylǵan. Olardyń ishinde IT, sáýlet jáne sán óneri, mádenı-demalys mekemeleri, kitaphanalar men mýzeıler, sondaı-aq halyqtyń qolóneri eńbekti kóp qajet etetin salalar bolyp sanalady.
Elimizde kreatıvti ındýstrııany damytý qory qurylady
Mádenıet jáne aqparat mınıstri Aıda Balaeva Úkimet otyrysynda elimizde jetekshi shyǵarmashylyq jáne bilim berý uıymdarynyń qatysýymen kreatıvti ındýstrııany damytý qoryn qurý josparlanyp otyrǵanyn habarlady.
Mınıstr Memleket basshysy 2021 jylǵy Joldaýynda kreatıvti ındýstrııany qoldaýdyń arnaıy ınstıtýtyn qurýdy tapsyrǵanyn atap ótti. Osylaısha, zańnamaǵa sáıkes, kreatıvti ındýstrııany damytýǵa járdemdesetin zańdy tulǵa – Kreatıvti ındýstrııalardy damytý qory bolady.
Qor Qazaqstannyń jetekshi shyǵarmashylyq jáne bilim berý uıymdarynyń qatysýymen korporatıvtik qor retinde qurylady jáne negizgi 4 baǵyt boıynsha júzege asyrylady:
Talanttardy anyqtaý (konkýrstar, kreatondar, mobıldi prodıýserlik ortalyqtar uıymdastyrý, óńirlerde talanttardy izdeý).
Jobalardy damytý (startaptardy akselerasııalaý jáne ınkýbasııalaý, kommersııalandyrý, ınvestısııa tartý).
Infraqurylymdy damytý (habtar jelisin keńeıtý, turaqty art-alańdar qurý, memlekettik múlikke qol jetkizýdi qamtamasyz etý).
Eksportqa qoldaý kórsetý (sheteldik aýdıtorııaǵa shyǵý, marketıng jáne PR, avtorlyq quqyqty qorǵaý).
«Elimizdegi Kreatıvti ındýstrııalardy damytý qorynyń bıýdjeti ulttyq lotereıa operatory qyzmetinen bólinetin 3% aýdarym esebinen qalyptastyrylady. Qor qyzmetiniń mańyzdy baǵyttarynyń biri – kreatıvti ındýstrııadaǵy venchýrlyq ınvestısııalardy damytý. Osyǵan baılanysty AHQO bazasynda basqarýshy kompanııalardyń pýlyn tarta otyryp, jedel jáne qaıtarymdy negizde aqshalaı qarajatty tıimdi ornalastyrýǵa múmkindik beretin venchýrlyq bólimshe qurylatyn bolady», dep tolyqtyrdy Aıda Balaeva.
Oblystar men elimizdiń iri qalalarynda kretıvti ortalyqtar ashylady
Aıda Balaeva Úkimet otyrysynda el óńirlerinde kreatıvti habtardy damytý jónindegi jumys týraly da baıandady.
Ol jergilikti atqarýshy organdarǵa kreatıvti ındýstrııany damytý boıynsha zańnamalyq quzyret berilgenin atap ótti. Bul norma el óńirlerinde kreatıvti habtar qurý jáne damytý maqsatynda qabyldandy.
«Búgingi tańda respýblıka boıynsha 12 kreatıvti hab ashyldy. Alaıda, Aqmola, Almaty, Jetisý, Ulytaý, Jambyl, Qaraǵandy, Qostanaı jáne Pavlodar oblystarynda bul jumys áli aıaqtalǵan joq. Kreatıvti habtar – óńirlerdegi kreatıvti ındýstrııany damytýdyń negizgi ınfraqurylymy bolýǵa tıis. Olar óńirlik ekojúıeniń ortalyǵyna aınalyp, talanttardy tartý jáne olarmen jumys isteý boıynsha mańyzdy ról atqarady», dep atap ótti Aıda Balaeva.
