Foto: «QazAvtoJol» UQ» AQ
19 naýryz saǵat 01:50 shamasynda aýa temperatýrasynyń kóterilýi men qardyń jyldam erýinen «Astana – Shiderti – Pavlodar – Ýspenka» respýblıkalyq avtojolynyń 217–218 shaqyrymy aralyǵyndaǵy joldy sý basyp qalǵan.
Sý basqan ýchaskeniń jalpy uzyndyǵy 100-150 metrge, al sý bıiktigi 5-8 sm-ge jetken.
«Bul ýchaske tómen ornalasqandyqtan, erigen qar sýy osy aımaqqa shoǵyrlanǵan. 217-shaqyrymda dıametri 1×1 m bolatyn sý ótkizgish qubyr bar, ol qazirgi ýaqytta ashyq jáne tazartylǵan kúıde jumys istep tur. Tasqynnyń ary qaraı jaıylýynyń aldyn alý jáne saldaryn barynsha azaıtý maqsatynda 200 tonna qum men 800 qap daıyndaldy, sondaı-aq 1 ekskavator, 1 tıegish, 3 samosval, 2 jol jóndeý qyzmetiniń tehnıkasy jáne DEÝ-60-tyń 30 qyzmetkeri jumyldyryldy», delingen «QazAvtoJol» UQ» AQ habarlamasynda.
Búgin saǵat 10:30-da joldaǵy kólik qozǵalysy qalypyna keltirilgen. Mamandar jaǵdaıdy turaqty baqylaýǵa alǵan.
