Býyrqanǵan Buqtyrma

Zardap shekken zyrıandyqtarǵa gýmanıtarlyq kómek jiberildi Shyǵys óńiriniń Zyrıan aýda­nyn­daǵy birqatar eldi meken­derdi qarǵyn sý basyp, jaǵdaı kúrdelene tústi. Aýdan aýmaǵymen ótetin Buqtyrma ózeni býyrqana tasyp, sý deńgeıi 26 sáýirde 530 santımetrge deıin jetken-di. Al 28 sáýirde sý deńgeıi 7 metr­ge deıin kóterildi. Qazirgi kezde qarǵyn sýdyń qarqyny sál de bolsa báseńdegenimen, sınoptıkterdiń jaqyn kúnderi jaýyn-shashyn túsý boljamyna baılanysty áli de alańdaýshylyq basym. Buqtyrma arnasynan asa tasy­ǵandyqtan aýdandaǵy 7 eldi meken sý astynda qaldy. Atap aıtqanda, Zýbovsk, Maleevsk, Pýtınsevo, Parygıno, Baıanovsk, Bykovo jáne Snegırovo aýyldary qyzyl sýdan aıtarlyqtaı zardap shekti. Osyǵan oraı óńir basshysy Danıal Ahmetovtiń tapsyrmasymen jaǵdaıdy baqylaý jónindegi jumys toby quryldy. Oblys ákiminiń orynbasary Dmıtrıı Garıkovtyń jetekshiligindegi jumys toby aýdandaǵy tótenshe jaǵdaımen tanysyp, tıisti sharalar qabyldanǵanyn jetkizdi. D.Garıkovtyń aıtýynsha, jumys toby aýdandaǵy sý astynda qalǵan eldi mekenderdi tikushaqpen aralap kórip, barlyq ınjenerlik qurylǵylardy tekserip shyqty. – Aýdandaǵy toǵan óz mindetin atqarǵanymen, ondaǵy jınalǵan sý deńgeıi qaýipti mólsherden asyp ketip, tómen qaraı jóńkile bastaǵan. Sonyń saldarynan eldi mekender men «О́skemen-Rahman qaınary» respýblıkalyq trassasynyń Snegırovo aýylynyń janymen ótetin tusyn sý alyp, kópirdi buzyp ketti. Oblystyq tótenshe jaǵdaılar departamenti, ishki ister departamenti, jergilikti atqarýshy organdar jáne medısınalyq qyzmettiń jedel is-qımylynyń nátıjesinde 974 adam qaýipsiz jerge der kezinde kóshirildi. Olardyń ishinde 217 bala bar. Adam shyǵyny joq, – dedi D.Garıkov. Zyrıan qalasyna jetkizilgen turǵyndarǵa jatyn oryn berilip, tamaqtandyryldy. Jergilikti turǵyndar zardap shekkenderge jyly kıimdermen, azyq-túlik­pen kómek kórsetýde. Aldyn ala málimetter boıynsha, aýdanda 356 úı sý astynda qalyp, basym bóligine aıtarlyqtaı nuqsan kelgen. Tipti Snegırovo aýylyndaǵy keıbir úılerdiń shatyryna deıin sý alyp ketip, monsha men qora-qopsylaryn buzyp ketti. Jumys toby sonymen birge, Katonqaraǵaı aýdanyndaǵy jaǵdaıdy da qarap, Buqtyrma ózeniniń joǵary jaǵy men aǵysyn tekserdi. Qazir ondaǵy ahýal tynysh, muzdyqtar men qardyń erýi áli bastalmaǵan. Erigen sý negizinen Turǵysyn jáne Hamır ózenderine qosylýda. Zyrıan aýdanynda turǵyndardy kóshirý jáne sý basýdyń saldarlaryn joıý úshin 230 adam men 50 tehnıka jumys isteýde. Olarǵa jergilikti turǵyndar da kómektesip jatyr. Tabıǵattyń tosyn minezinen týǵan tasqynǵa turǵyndar da túsinistikpen qarap otyr. Al Zyrıan aýdanyn bas­qa eldi mekendermen jáne oblys ortalyǵymen jalǵaý úshin Kaz­nakovka jaǵalaýy men Kúr­shimdi janaı ótetin temirjoly, sondaı-aq jaǵdaıdy eskere otyryp Va­sılev jaǵalaýyn merziminen erte iske qosý qarastyryldy. Sonymen birge, Zyrıanda jedel kómekke arnalǵan tikushaq turaqty kezekshilik etýde. Avıasııa kómegin oblys ortalyǵyna jóneltilgen bir naýqas paıdalanyp ta úlgerdi. Dýman ANASh, «Egemen Qazaqstan». Shyǵys Qazaqstan oblysy.