Sýret: krmm.kz
Taldyqorǵanda Qaratal ózeniniń jaǵalaýyna 141 qaraǵaı kósheti otyrǵyzyldy. Panfılov aýdanynda 3 myńnan asa aǵash egildi. Ekologııalyq mádenıetti qalyptastyrýǵa baǵyttalǵan Taldyqorǵandaǵy kógaldandyrý sharasyna memlekettik qyzmetshiler, orman sharýashylyǵynyń ókilderi, belsendi turǵyndar, uzyn sany 100 adam qatysyp, ózen jaǵalaýynyń oblystyq perınataldyq ortalyqtan Tennıs kortyna deıingi aralyǵyna aǵash ekti.
Jalpy, oblys ortalyǵynda jyl boıy 12 myń japyraqty jáne qylqan japyraqty aǵash otyrǵyzý josparlanǵan, onyń 2 myńǵa jýyǵy kóktemde, 10 myńy kúz mezgilinde otyrǵyzylmaq.
«Naýryz merekesiniń bastalý qurmetine «Taza Qazaqstan» ekologııalyq baǵdarlamasy aıasynda aǵash otyrǵyzý aksııasyn ótkizdik. Búgin qalada negizinen qaraǵaı kóshetteri otyrǵyzyldy, óıtkeni bul aǵash túriniń ekologııaǵa paıdasy óte zor. Taldyqorǵanda ǵana emes, oblystyń ózge óńirlerinde de osyndaı sharalar atqarylyp jatyr», deıdi Tabıǵı resýrstar jáne tabıǵat paıdalanýdy retteý basqarmasynyń basshysy Eldos Myrzabek.
Panfılov aýdany qylqan japyraqty aǵashtyń 10 túrin ekti. Kóshetter mektepter aýlasyna, skverlerge, kóshelerdiń boıyna otyrǵyzyldy. Aınalasyn jas kóshettermen kómkergen bilim oshaqtarynyń biri – Jarkenttegi jańa mektep.
«Mektebimiz jańa, ishindegi qural-jabdyqtary, kabınetterimiz – bári zamanaýı. Búgin mine, aınalasyna aǵash egip, kórkeıtip jatyrmyz. Endi bul aǵashtardy sýaryp, kútip-baptaýǵa biz, oqýshylar, ózimiz atsalysamyz. Kógaldandyrý – ekologııany jaqsartýdyń basty belgisi. Sondyqtan osyndaı aǵash egý sharalaryna jyl saıyn belsene qatysatyn bolamyz», deıdi Jarkenttegi «Jaıly mekteptiń» 10-synyp oqýshysy Albına Qalıeva.
Oblys ákimi baspasóz qyzmetiniń málimetinshe, bıyl aýdan, qala aýmaqtarynda 120 myń kóshet (kóktemgi kezeńde – 54,2 myń, kúzgi kezeńde – 65,8 myń) otyrǵyzý kózdelgen. Onyń ishinde 108 myńy jalpaq japyraqty, 12 myńy qylqanjapyraqty aǵashtar. Aýdan, qala ákimdikteri kóktemge josparlaǵan aǵash otyrǵyzý jumystary búginnen bastalyp otyr.
Aıta keteıik, 22 naýryz merekesine oraı, oblys kóleminde taǵy 5 myńǵa jýyq kóshet otyrǵyzylady. Onyń 1,7 myńy qylqanjapyraqty, 3,3 myńy jalpaq japyraqty aǵash kóshetteri.
Jetisý oblysy
