Bankke osydan eki kún buryn ótinish bergen jas maman búgin eki bólmeli páterdiń qujatyn qolyna aldy. Danııar páterdi jańa salynyp jatqan záýlim úılerdiń birinen tańdaǵan. Munda qazir árleý jumystary júrip jatyr. Páterdi bastan-aıaq qurylys kompanııasynyń ózi salyp, kirýge daıyn etip beredi.
«Qýanyshymdy sózben aıtyp jetkizý múmkin emes. Osyǵan deıin anam ekeýmiz páter jaldap turyp keldik. Endi basymda úıim bar. Ásirese anamnyń qýanǵanyn kórseńiz. Bul – meniń jeke ómirimdegi úlken qadam, umytylmas sátterdiń biri. Endi keleshektiń qamyn jasap, otbasyn qurý jaǵyn oılastyra bersem bolady», deıdi jas maman.
«Naýryz jumysker» baǵdarlamasy – jumysshy mamandarǵa memleket tarapynan jasalyp jatqan naqty qoldaý, úlken qamqorlyq. Baǵdarlamaǵa qatysýshylarǵa turǵyn úı tańdaýǵa alty aı ýaqyt beriledi. Bastapqy jarnanyń kólemi – baspana baǵasynyń 10%-y. Alaıda bul 2 mıllıon teńgeden kem bolmaýǵa tıis.
Baǵdarlama iske qosylǵan alǵashqy úsh kúnniń ishinde «Otbasy bank» 31 mlrd teńgege 1 094 ótinish qabyldaǵan. О́tinish jasaǵandardyń ortasha jas mólsheri – 31-de. Nesıe alýshylardyń eń jasy – endi ǵana eńbek jolyn bastaǵan 19-daǵy jastar.
«Eń bastysy, baǵdarlama naqtyly jumys isteıdi. Iаǵnı jas mamandar tıimdi baǵamen turǵyn úı satyp ala alady. Qurylys kompanııalary da turǵyndar qosymsha qıyndyq kórmeıtin, tolyq aıaqtalǵan páterlerdi usynýǵa daıyn. Memleket basshysy 2025 jyldy «Jumysshy mamandyqtar jyly» dep jarııalaǵany belgili. Osyǵan oraı elimizde jumysshylardyń ómir súrý sapasyn jaqsartýǵa baǵyttalǵan naqty sheshimder qabyldanyp, iske asyrylyp jatyr. Muny zaýyt-kásiporyndar da qoldap otyr. Memlekettik baǵdarlama jas mamandardyń baspanaly bolýyna kómektesedi», deıdi «Otbasy bank» basqarmasy tóraǵasynyń orynbasary Nurlan Aqshanov.
Qostanaı oblysy
