Sýret: kisi.kz
Atalǵan alańda jetekshi sarapshylar, saıasattanýshylar, ǵylymı qaýymdastyq jáne qoǵamdyq uıymdardyń ókilderi saıası jańǵyrýdyń negizgi jetistikterin, keıingi úsh jylda elimizdegi saıası, ekonomıkalyq jáne áleýmettik reformalar salasynda júrgizilip jatqan júıeli jumystardy talqylady. Sarapshylar qysqa merzim ishinde eldiń saıası qurylymynda eleýli ózgerister bolǵanyn, sonyń ishinde saıası júıeniń lıberalızasııasy, Parlament róliniń kúsheıýi jáne bılikti ortalyqsyzdandyrý úrdisin sóz etti. Sondaı-aq sot salasynyń reformalary da qozǵaldy.
Prezıdent janyndaǵy QSZI Almaty qalasyndaǵy ókildiginiń basshysy Ásel Nazarbetova elde qysqa merzim ishinde birqatar saıası reforma júzege asyrylǵanyn aıtty.
«Ekonomıkany jańǵyrtý jáne qoǵamdyq etıkany jańartý jóninde aýqymdy jumys atqaryldy. Mańyzdy reformalardyń biri 2022 jyly Qazaqstan Konstıtýsııasyna ózgerister engizý boldy. Bul eldiń saıası qurylymynda eleýli ózgeris ákeldi. Qabyldanǵan reformalar sheńberinde partııalyq jáne saılaý júıesin yryqtandyrý jumystary iske asyryldy. Prezıdenttiń ókilettikterin shekteý boıynsha sharalar qabyldandy: Prezıdent partııa múshesi bolý jáne oblys ákimderin taǵaıyndaý quqynan aıyryldy, Memleket basshysyn qaıta saılaýǵa tyıym salyndy», deıdi Á.Nazarbetova.
Onyń aıtýynsha, 2022 jylǵy referendým nátıjesinde bastalǵan aýqymdy saıası jáne ekonomıkalyq reformalardan keıin Qazaqstan demokratııa ınstıtýttaryn nyǵaıtý, qoǵamdyq dıalogti keńeıtý jáne memlekettik saıasatty jetildirý baǵytyn jalǵastyryp keledi.
«Ulttyq quryltaı bılik, azamattyq qoǵam jáne sarapshylar qoǵamdastyǵynyń ókilderi ózekti syn-qaterler boıynsha birlesken sheshimder ázirleıtin alańǵa, ulttyq máseleler men eldiń strategııalyq damýyn talqylaýdyń mańyzdy tetigine aınaldy. Býrabaıda ótken quryltaıdyń kezekti otyrysy bul úderistegi mańyzdy kezeń bolyp, júıeni odan ári reformalaý men jańǵyrtý úshin jańa baǵdarlardy aıqyndap berdi», dedi Á.Nazarbetova.
Mańyzdy taqyryptardy talqylaýǵa qatysqan Almaty Azamattyq alıansynyń tóraǵasy Qaıyrjan Ábdihalyqov álem úkimetter men halyqtar arasyndaǵy baılanysty nyǵaıtý, bıliktiń ashyqtyǵyn qamtamasyz etý jáne ulttyq konsensýstyń qalyptasýyna yqpal etý úshin ulttyq jınalystar men assambleıalardyń alýan túrli nysanyn qalyptastyra bastaǵanyn aıtty. Memleket pen qoǵam arasyndaǵy osyndaı pármendi ári zamanaýı kommýnıkasııa arnasy retinde elimizdegi Ulttyq quryltaıdy erekshe atap ótti.
«Halyq únine qulaq asatyn memleket» tujyrymdamasyna Prezıdent 2019 jyly bastamashy bolǵanyn bárimiz bilemiz. Ony júzege asyrýdyń bes jylynda óte jaqsy nátıjeler baıqaldy. 2024 jylǵa qaraı «Qoǵamdyq baqylaý týraly» zań kúshine engenin aıtqym keledi, endi azamattardyń suraqtar qoıýǵa, bıýdjet qarajatynyń jumsalýyn tekserýge quqy bar. Buryn bul qoǵamdyq keńesterdiń nemese depýtattardyń ǵana quzyreti bolsa, endi kez kelgen azamat muny jasaı alady. Bul da – Memleket basshysynyń azamattyq qoǵamdy qoldaǵan bastamasy», dedi Q.Ábdihalyqov.
Sarapshynyń aıtýynsha, azamattyq qoǵamdy turaqty damytý úshin memlekettik organdarmen ózara is-qımyl bolýy kerek ekenin túsiný óte mańyzdy. Al memlekettik organdar da bir orynda turmaı, reformalanýǵa tıis.
Jalpy, ulttyq saraptama alańynyń kezekti otyrysynda reformanyń tıimdiligi, aldaǵy damý joldary, Ulttyq quryltaıda usynylǵan Ishki saıasat tujyrymdamasy, kommersııalyq emes uıymdarǵa (ÚEU) qatysty zańnamalyq ózgerister, shaǵyn jáne orta bıznesti qoldaý men memlekettiń jalpy bolashaqtaǵy damýy talqylandy.
ALMATY
