Jarysta «Altyn alqa», «Kúmis alqa» ıegerleri birneshe kezeń boıynsha synǵa tústi. Alǵashqy kezeńde qatysýshylar ózderin tanystyrdy. Ekinshi kezeń «Aqyldasyp pishken ton kelte bolmas» dep atalyp, otbasyǵa qatysty qoıylǵan logıkalyq suraqtarǵa jaýap berdi. «Úzdik úrdis» atty úshinshi kezeńde yqylym zamannan beri urpaqtan urpaqqa jalǵasyp kele jatqan qazaq áıelderiniń kıim kııý úlgisi kórsetildi. Sońǵy kezeńde ónerlerin ortaǵa saldy.
Qazylar alqasynyń sheshimimen Juban ana atyndaǵy syılyqty Sátbaev qalasynyń turǵyny, segiz balanyń anasy Aıjan Sháripova, «Dańqty ana» atalymyndaǵy syılyqty Sátbaev qalasynyń jeke kásipkeri, jeti balanyń anasy Áıgerim Toqtasynova, «Álpesh ana» atalymyn Jezqazǵan qalasyndaǵy №4 mekteptiń muǵalimi, segiz balanyń anasy Aqjarqyn Toqysheva, «Bıdásh ana» atalymyn «Qazaqmys» korporasııasy Qarsaqbaı metallýrgııa zaýytynyń laboranty, Jezdi, Ulytaý aýdandyq keńesteriniń depýtaty bolǵan qaıratker áıel, segiz balanyń anasy, 13 nemereniń ájesi Sandýǵash Dútbaeva oljalady.
«Alqaly arý-2025» baıqaýynda III oryn alǵan «Altyn alqa» ıegeri, Qarajal qalasyndaǵy Analar keńesiniń múshesi, nemere súıgen ardaqty áje Aqtoty Ádilbekovaǵa 150 myń teńge, II oryn ıegeri Sátbaev qalasyndaǵy Abaı atyndaǵy lıseıdiń qazaq til-ádebıeti pániniń muǵalimi, jeti balanyń anasy Aıgúl Ábishevaǵa 250 myń teńge, I oryn júldegeri «Kúmis alqa» ıegeri, Ulytaý aýdany, Jezdi kenti aýrýhanasynyń medbıkesi Gúljazıra Zeıilǵazınaǵa 300 myń teńge aqshalaı syıaqy tabys etildi. «Alqaly arý-2025» baıqaýynyń bas báıgesi, 500 000 teńge syıaqy alty balanyń anasy, jeke kásipker, kıno, teatr ártisi Samal Sadyqovaǵa buıyrdy.
Jarysqa qatysýshylarǵa «Halyq bank» AQ Ulytaý oblystyq fılıaly tehnıka dúkeninen zat alýǵa sertıfıkattar, atalym ıegerlerine «Atameken» kásipkerlik palatasynyń Ulytaý oblystyq fılıalynyń atynan arnaıy kýrstar alý múmkindigin beretin joldamalar tabys etildi.
Ulytaý oblysy
