Sýret: gov.kz
Taraptar qazaq-armıan qatynastarynyń keń aýqymdy máselelerin talqylady. Atap aıtqanda, eki el arasyndaǵy saıası, saýda-ekonomıkalyq jáne mádenı-gýmanıtarlyq ózara is-qımyldyń basym baǵyttary, sondaı-aq bıylǵa arnalǵan joǵary deńgeıdegi is-sharalar kestesi qarastyryldy. Dostyq pen ózara tıimdi yntymaqtastyq negizinde ekijaqty seriktestikti tereńdetýge mán berildi. Taraptar nıetiniń is júzindegi kórinisi Armenııanyń Qaraǵandy men Aqtóbedegi qurmetti konsýldarynyń keńselerin ashý boldy.
«Armenııa – Qazaqstannyń Ońtústik Kavkazdaǵy senimdi saıası jáne saýda-ekonomıkalyq seriktesi jáne qazaq-armıan baılanystary esh qıyndyqsyz, syndarly kózqaraspen damýda jáne bir-biriniń múddelerin eskerýge daıyn. Men eki halyqtyń ıgiligi úshin barlyq ýaǵdalastyqty iske asyrý maqsatynda eń tyǵyz ózara is-qımylǵa daıyn ekenimdi bildiremin», dedi M.Nurtileý.
Eki eldiń bıznes-toptarynyń iskerlik baılanystardy damytýǵa qatysýynyń mańyzy atalyp ótti. Búgingi tańda Armenııada qazaqstandyq kapıtaldyń qatysýymen 100-den asa kásiporyn, al Qazaqstanda 430-dan asa armıan kompanııasy tirkelgen.
Armenııa SIM basshysy ótken jyl bizdiń memleketter arasyndaǵy ekijaqty qarym-qatynas tarıhyndaǵy mańyzdy kezeń bolǵanyn málimdedi. Ol joǵary deńgeıdegi saparlarǵa, sondaı-aq kóptegen birlesken is-sharaǵa toly bolǵanyn atap ótti.
«Bul ártúrli saladaǵy ózara is-qımylǵa qajetti serpin berdi. Memleketterimiz egemendik pen táýelsizdikti nyǵaıtýǵa, sondaı-aq tranzıttik áleýetti arttyrýǵa jáne ulttyq ekonomıkalardy jańǵyrtýǵa umtylýda birtutas ekenin baıqatty. Munyń bári seriktestik qarym-qatynasty keńeıtý úshin berik negiz jasaıdy. Erevan men Astana halyqaralyq jáne óńirlik kún tártibindegi negizgi máseleler boıynsha jıi sáıkes nemese uqsas ustanymdarǵa ıe», dedi A.Mırzoıan.
Taraptar ınvestısııalyq baılanystardy odan ári nyǵaıtýǵa járdemdesýge ýaǵdalasty. Armıan ekonomıkasyna qazaqstandyq kapıtal salymdarynyń jalpy kólemi 56 mln dollardan asady.
Mádenı-gýmanıtarlyq yntymaqtastyqtyń da mazmundy kún tártibi atalyp ótti. Memleket basshylarynyń qatysýymen ótken jyly Qazaqstanda Armenııanyń mádenıet kúnderi ótti. Bıyl Qazaqstannyń Armenııadaǵy mádenıet kúnderi mádenı almasýdyń oń tájirıbesin jalǵastyrady.
