Foto: Oqý-aǵartý mınıstrligi
Mundaı bastamalar qala men aýyl mektepteri arasyndaǵy bilim berý sapasyndaǵy alshaqtyqty azaıtýǵa baǵyttalǵan. Máselen, keıingi 3 jylda elimizdegi 4 myńnan astam mekteptiń materıaldyq-tehnıkalyq bazasy jańartylǵan. 2 myńnan astam bilim berý uıymynda robototehnıka, hımııa, bıologııa, fızıka jáne STEM boıynsha zamanaýı pándik kabınetter ashylǵan. 2024 jyly 967 mektepte 1621 pándik kabınet jabdyqtalǵan. Mınıstrlik 2029 jylǵa qaraı elimizdiń mektepterinde keminde 7000 zamanaýı pándik kabınet ashý josparlanǵanyn jetkizdi.
«Bilim berý sapasyn arttyrýdyń taǵy bir mańyzdy faktory - sıfrlyq tehnologııalardy engizý bolyp tabylady. Ulttyq bastamalar aıasynda mektep oqýlyqtarynyń 100%-y sıfrlyq formatqa kóshirildi, al mektepterdiń 95,2%-da joǵary jyldamdyqty ınternetke qoljetimdilik aıtarlyqtaı jaqsardy. Bilim berý platformalary engizilýde, jasandy ıntellekt elementteri oqý prosesine ıntegrasııalanýda. Osy sharalardyń barlyǵy oqýshylardy bolashaqtyń syn-qaterlerine daıyndaýǵa jáne olardyń boıynda erte jastan sıfrlyq daǵdylardy qalyptastyrýǵa baǵyttalǵan», delingen Oqý-aǵartý mınıstrliginiń habarlamasynda.
Sondaı-aq, vedomostvo pedagog kadrlardyń áleýmettik jaǵdaıy men kásibı daǵdysyn damytýǵa aıryqsha mán berilip otyrǵanyn da tilge tıek etken. 2020 jyldan bastap pedagogterdiń jalaqysy 2 esege artyp, al biliktilik sanattary bar muǵalimderge ol úshin laýazymdyq jalaqysynyń 35%-dan 50%-ǵa deıin ústemeaqy tólenip otyr. Búginde orta bilim berý júıesinde jumys isteıtin 400 myń pedagogtiń 300 myńǵa jýyǵyna osyndaı ústemeaqylar tólenedi.
«Aýyl muǵalimderin qoldaýǵa erekshe nazar aýdarylyp, olardyń jalaqysy qalalardaǵy áriptesterimen salystyrǵanda kem degende 25%-ǵa joǵary. Bul óńirlerge bilikti kadrlardy tartýǵa yqpal etedi. 2023 jyldyń qyrkúıeginen bastap Prezıdenttiń tapsyrmasy boıynsha barlyq bastaýysh synyp jáne áleýmettik osal toptar sanatyndaǵy oqýshylardy tegin ystyq tamaqpen qamtylyp jatyr. 1,7 mıllıon oqýshyny qamtamasyz etýge jergilikti bıýdjetterden 192 mlrd teńgeden astam qarajat bólindi. Sondaı-aq tamaqtaný sapasyn arttyrý maqsatynda ashana qyzmetkerlerine qoıylatyn talaptar kúsheıtildi, tegin tamaq alýshylardyń esebi avtomattandyryldy, kúndelikti baqylaý engizildi», dep habarlady mınıstrlik.
Sonymen qatar «Jalpyǵa birdeı bilim berý» qory aıasynda áleýmettik osal sanattaǵy 510 myńnan astam oqýshy mektep quraldarymen qamtamasyz etilgen. Keler oqý jylynan bastap jekemenshik mektepterdiń oqýshylary úshin de áleýmettik qoldaý sharalaryn engizý josparlanǵan.
