Bárimiz biletin Belger

Almaty qalasyndaǵy M.Áýezov atyndaǵy akademııalyq drama teatrdan ádebıetsúıer qaýym qazaqtyń belgili qalamgeri Gerold Belgerdi sońǵy saparǵa shyǵaryp saldy. Azaly jıynda Qazaqstan Respýblıkasynyń Prezıdenti Nursultan Nazarbaevtyń kóńil aıtý jedelhatyn oqyp bergen Mádenıet jáne aqparat mınıstri Arystanbek Muhamedıuly keleshekte Gerold Belger esimi elenetinin jetkizdi. Kózi tirisinde: «Qazaq topy­raǵynan nár alǵan men úshin qazaqtyń qorjynynyń tolyq bolǵany asa qajet. Kópshil adam retinde maǵan nemistiń shujyǵy men syrasy jetispese de, qazaqtyń qazysy men shubaty janyma jaqyn. Eń bastysy, kókiregimde qazaqylyqtyń kúıi oınamasa, men ózimdi kemeline kelgen adammyn dep eseptemeımin», dep jazyp ketken Geraǵamen qoshtasýǵa halyq óte kóp jınaldy. Mar­qumnyń qalamdas dostary men tirisinde pikirles bolǵan azamattar, shyǵarmashylyǵyn qurmetteıtin ári jaqyn aralasa bilgen oqyrmandary, belgili zııa­ly qaýym ókilderi, bári ortaǵa shyǵyp, sońǵy qoshtasý sózin tebirene sóıledi. Almaty qalasynda orna­lasqan Germanııa kon­sýl­dyǵynyń bas ókili Renate Shımkoraıt qazaq qalamgeri Gerold Belger týraly: «Ol qazaq-nemis halqyna qatar qyzmet etken tulǵa boldy. Eki ulttyń arasyn ádemi jalǵap, bizderdi baýyrlastyrýǵa ómirin arnady», degen pikirin bildirdi. Belgili qoǵam qaıratkeri, aıtýly aqyn Oljas Súleımenov jazýshynyń qazaq halqynyń jadynda árdaıym saq­talatynyn, onyń eńbekteri uzaq jasaıtynyn tilge tıek etti. Kópshilik ishinen qos ulyn jetektep shyqqan bir oqyrman: «2010 jyly dúnıege kelgen egizderimniń birin – Gerold dep, ekinshisin Belger dep atadym», degende qoshtasýǵa kelgen jurt tebirenip ketti. Qazaq mádenıeti men áde­bıetiniń kókjıegin keńeıtýge atsalysqan Gerold Belgerdi sońǵy saparǵa shyǵaryp sal­ǵanda Almatynyń aýa raıy da meılinshe jaılylyq tanytty. Qanat ESKENDIR, «Egemen Qazaqstan».