Vedomstvo málimetinshe, bul jaǵdaı jyldyq munaı óndirý josparynyń oryndalýyna áser etpeıdi. Barlyq kólemder balama baǵyttarǵa qaıta baǵyttalady:
- 100 myń tonna munaı Ýst-Lýga porty arqyly eksporttalady;
- 160 myń tonnasy Kaspıı qubyr konsorsıýmy júıesine jiberiledi.
Mınıstrlik ókili Asel Serikpaeva bul ózgerister júk jóneltýshilermen kelisilgenin jáne tek operasııalyq sıpatta ekenin atap ótti.
«Aǵyndardy qaıta baǵyttaý júk jóneltýshilermen kelisilgen jáne operasııalyq sıpatqa ıe. Tasymaldaý baǵyttarynyń ózgerýi munaı óndirýdiń jyldyq josparynyń oryndalýyna áser etpeıdi. Qoldanystaǵy kólik ınfraqurylymy Qazaqstanǵa eksporttyń turaqtylyǵyn tolyq kólemde qamtamasyz etip, álemdik naryqtarǵa shıkizattyń úzdiksiz jetkizilýin saqtaýǵa múmkindik beredi», dedi mınıstrliktiń resmı ókili Asel Serikpaeva.
Buǵan deıin vedomstvo basshysy Erlan Aqkenjenov Reseı tarapynan tranzıttiń toqtaýy múmkin ekenin, bul jaǵdaı syrtqy ınfraqurylymdaǵy oqıǵalarmen baılanysty bolýy yqtımal ekenin aıtqan edi. Keıin bul aqparat resmı túrde rastalǵan.
Jalpy eksport kóleminde «Drýjba» munaı qubyry baǵyty arqyly jylyna shamamen 3 mıllıon tonna munaı jetkiziledi, onyń negizgi bóligi Germanııaǵa baǵyttalǵan.
