Balyq sharýashylyǵy komıtetiniń tóraǵasy Serik Sermaǵambetovtiń aıtýynsha, balyq qorǵaý aksııasy 31 mamyrǵa deıin jalǵasady. Keńaýqymdy aksııany ótkizýge 1466 qyzmetker qatysady. Onyń ishinde Atyraý oblysynda 604, Batys Qazaqstanda – 222, al Mańǵystaý óńirinde 640 qyzmetker sý aıdyndaryn qadaǵalalaıdy. Sondaı-aq 298 avtokólik, 84 qaıyq pen shaǵyn kólemdi keme, 6 ushý apparatyn tartý kózdelgen.
«Aksııa kezinde tabıǵat jáne quqyq qorǵaý organdarynyń qyzmetkerleri baǵaly bekire tuqymdast balyq túrlerin brakonerlerden qorǵap, ýyldyryq shashýyn qamtamasyz etedi. О́ıtkeni jyl saıyn bekire tuqymdas balyqtardyń sany azaıyp barady. Osyǵan baılanysty Aýyl sharýashylyǵy, Ishki ister mınıstrleri men Ulttyq qaýipsizdik komıteti tóraǵasynyń «Bekire» balyq qorǵaý aksııasyn ótkizý týraly birlesken buıryǵyna qol qoıyldy. Soǵan sáıkes balyq qorǵaý aksııasyn úılestirý shtaby qurylyp, oǵan jetekshilik etý Balyq sharýashylyǵy komıtetine júkteldi», dedi Serik Sermaǵambetov.
Shekara qyzmetiniń Atyraý oblysy boıynsha departamenti bastyǵynyń birinshi orynbasary Aıdos Qıqabaevtyń málimetinshe, brakonerler jıi boı kórsetetin aýmaqtarda stasıonarlyq jáne jyljymaly beketter, mobıldi toptar uıymdastyrylady.
«Kaspıı teńiziniń jaǵalaýy men akvatorııasynda, Jaıyq pen Qıǵash ózenderiniń saǵasynda baqylaý kúsheıtiledi. Áýejaılar, vokzaldar men avtojoldarda balyq pen balyq ónimderin zańsyz tasymaldaýǵa qarsy is-sharalar júrgiziledi. Bizdiń basty mindetimiz – memlekettik shekara mańynda brakonerlik áreketterdi der kezinde anyqtaý. Baqylaý beketteriniń jumysyn kúsheıtip, Jaıyq-Kaspıı sý basseıninde, ózen-kólderde patrýldeý jumysyn jalǵastyramyz», dep málimdedi ol.
