Foto: Ashyq derekkóz
«Bul – Qazaqstannyń daǵdarystardan tys qalýynyń taǵy bir dáleli. Iá, Tramptyń tarıftik soqqysy álemdik saýdada ózgeristerge ákelýi múmkin, biraq bizge tek onyń janama áserleri ǵana sezilýi yqtımal», dedi ol.
Rysmambetovtyń aıtýynsha, Qazaqstan AQSh-pen saýda profısıtine ıe. 2024 jyly el AQSh-qa 2 mlrd dollardan astam taýar eksporttasa, ımport kólemi 1 mlrd dollardy quraǵan.
«Qazaqstanǵa 27%-dyq baj salyǵy engizilgenimen, bul bizdiń negizgi eksportqa áser etpeıdi. Sebebi Qazaqstannan AQSh-qa eksporttalatyn taýarlardyń kóbi strategııalyq shıkizatqa jatady, al olarǵa prezıdenttik erekshelik berilgen», dep túsindirdi Rasýl Rysmambetov.
Qarjyger Qazaqstan úshin AQSh-tyń saýda saıasatynyń keıbir oń áserleri bolýy múmkin ekenin atap ótti.
«Jańa tarıfterge baılanysty AQSh-pen saýdasy qıyndaǵan elder óz ónimderin jańa naryqtarǵa baǵyttaýǵa tyrysady. Bul biz úshin tehnıka, metall, kólik jáne qurylys materıaldaryn tıimdirek baǵamen satyp alý múmkindigin týdyrady», dedi ol.
Sonymen qatar, eger tarıfter AQSh-ta ınflıasııany kúsheıtse, bul dollardyń álsireýine ákelýi múmkin. Mundaı jaǵdaıda, Qazaqstan úshin dollar aımaǵynan ımporttaý arzandaıdy, al tengeniń dollarǵa shaqqandaǵy baǵamy nyǵaıýy yqtımal.
Rysmambetov bul ózgerister Qazaqstannyń otandyq óndirisin qoldaýyna jaqsy múmkindik ekenin aıtady.
«Biz óz óndirýshimizge basymdyq berýimiz kerek. Aýyl sharýashylyǵy, óńdeý ónerkásibi jáne mashına jasaý salalaryn kúsheıtý qajet. Qazir tıimdi nesıe tartyp, zamanaýı jabdyqtar alý múmkindigi bar. Osy sátti paıdalanyp, jyldam áreket etý mańyzdy», dep qorytyndylady ol.
