Kollajdy jasaǵan – Záýresh SMAǴUL ,«EQ»
Olar qoǵamdyq oryndar, temirjol vokzaly, kompıýterlik klýbtardy aralady. Eń aldymen, temirjol vokzaly mańynda qyzyn ertip, kóshede júrgen masań kúıdegi áıel kózge túsip, polısııa bólimshesine jetkizildi. Kámeletke tolmaǵan balasymen ustalǵan áıelge qatysty ákimshilik hattama toltyrylyp, ýchaskelik ınspektorlarǵa joldandy. Odan keıin belsendiler Stýdentter úıi janynda ornalasqan táýlik boıy jumys isteıtin ashanaǵa kirip shyqty.
PD Iývenaldyq polısııa bóliminiń bastyǵy Botagóz Jálekeshevanyń aıtýynsha, mundaı oryndarǵa kámeletke tolmaǵandar keshki saǵat 22.00-den keıin ata-anasymen jáne zańdy ókilimen ǵana kele alady. Endigi baǵyt – kompıýterlik klýb. Qarańǵy ǵımarat ishinde júrgen birneshe jasóspirim anyqtaldy. Mundaı jaǵdaıda polısııa qyzmetkerleri olardyń ata-analaryna úsh aılyq kórsetkish esebinde aıyppul salady. Sondaı-aq kóńil kóterý ortalyqtarynyń ıelerine de on aılyq eseptik kórsetkishpen aıyppul salynady.
Jastar arasyndaǵy quqyq buzýshylyqtyń jyldan-jylǵa ósip bara jatqany – alańdatarlyq qubylys. «Jastar rýhy» QQ jetekshisi Álisher Tynyshtyq beımezgil ýaqytta bos sendelip júrgen jasóspirimderdiń bir-birimen janjaldasyp qalý qaýpi óte joǵary deıdi. Sol úshin balalar kóp jınalatyn qoǵamdyq oryndarda reıdtik sharalardy jıi ótkizip turý qajet.
Bıyl tártip saqshylary ákimshilik zań talaptaryn buzǵan 70 jetkinshek pen turmys jaǵdaıy tómen 36 otbasyny esepke alǵan. Aqtóbe oblysynda jyl basynan beri túngi ýaqytta oıyn-saýyq mekemelerinde júrgen 13 jasóspirim anyqtaldy. Polısııa qyzmetkerleri esepte turǵan áleýmettik jaǵdaıy tómen otbasylardy nazardan tys qaldyrmaıdy. Qazir oblysta 342 otbasy arnaıy esepke alynǵan.
Aqtóbe oblysy
