Sýretti túsirgen – Erlan OMAR, «EQ»
Eske salaıyq, 2024 jyly Memleket basshysy Qasym-Jomart Toqaevtyń bastamasymen «Naýryznama» onkúndigi aıasynda Naýryz meıramy jańa formatta toılana bastady. Sol jyldyń naýryz aıynda Mádenıet jáne aqparat mınıstrligi arnaıy qaýly qabyldap, 14-23 naýryz aralyǵyn «Naýryznama» onkúndigi dep jarııalady. Onkúndiktiń alǵashqy kúni retinde 14 naýryz – Kórisý kúni bolyp bekitilgen edi.
Osyǵan oraı Ulttyq mýzeıde Naýryznama onkúndigi sheńberinde «Amal merekesi – izgilik pen birliktiń belgisi» atty mádenı-tanymdyq is-shara ótti.
Merekeli jıynda ultymyzdyń rýhanı murasynda erekshe oryn alatyn Kórisý kúni – Amal merekesiniń tarıhı-mádenı mańyzy keńinen tanystyrylyp, ulttyq qundylyqtar dáripteldi, qoǵamdaǵy izgilik pen birlik ustanymdary nasıhat-taldy.
Ulttyq mýzeı dırektory Berik Ábdiǵalıuly ulyq merekeniń rýhanı mán-mańyzyna toqtalyp, jınalǵan qaýymdy quttyqtady.
«Sanaýly kúnderden keıin keletin áz Naýryzda tarıh qoınaýyna taǵy bir jylymyz jol tartyp, jańa kún tabaldyryqtan attaıdy. Kóktiń tynysyn tyńdap, jerdiń tamyryn basqan, turmys-tirshiligin tabıǵat anamen tyǵyz baılanys-tyrǵan halqymyz Naýryzdy jańarý men jasampazdyqtyń bastaýy, yryc pen berekeniń arqaýy dep baǵalaǵan. Al osy ulyq merekeniń bastaýy sanalatyn Amal kúni – adamdardyń bir-birimen kórisip, ótkenge salaýat aıtyp, jańa jyldy aq nıetpen qarsy alatyn taǵylymy tereń dástúr. Amal – tatýlyq pen baýyrmaldyqty bekemdep, aǵaıyn arasyn jaqyndastyratyn, izgilik pen syılastyqty dáripteıtin erekshe kún», dedi ol.
Iá, Amal merekesi – adamdardyń bir-birimen kórisip, amandyq surasý arqyly tatýlyqty, baýyrmaldyqty jáne ózara qurmetti nyǵaıtatyn ejelgi dástúrlerdiń biri. Bul kún urpaqtar sabaqtastyǵyn jalǵap, ulttyq biregeılikti saqtaýǵa qyzmet etetin mańyzdy rýhanı qundylyq retinde erekshelenedi.
Is-shara tanymdyq kezdesý, dástúrli rásimder tanystyrylymy jáne ınteraktıvti mádenı baǵdarlama formatynda ótti. Baǵdarlama barysynda qatysýshylar Amal merekesiniń shyǵý tarıhymen tanysyp, kórisý dástúriniń tárbıelik mánimen tanysty. Sondaı-aq qazaq halqynyń bata berý, úlkenge qurmet kórsetý, qol alysyp kórisý sekildi ulttyq salt-dástúrleri sahnalyq kórinistermen usynyldy. Jyr shýmaqtary da oqyldy.
Mádenı jıynǵa Ulttyq mýzeı qyzmetkerleri, mýzeı qonaqtary men ónerpazdar qatysty. Atap aıtsaq, «Bozoq» memlekettik tarıhı-mádenı mýzeı-qoryǵy, «Geraldıkalyq zertteýler ortalyǵy» respýblıkalyq memlekettik mekemesi men IýNESKO qamqorlyǵyndaǵy Halyqaralyq mádenıetterdi jaqyndastyrý ortalyǵynyń qyzmetkerleri, Astana qalasy ákimdiginiń janyndaǵy «Qoǵamdyq kelisim» KMM Dostyq úıi ókilderi, QR UQK Shekara qyzmetiniń ansambli, Astana qalasy ákimdigine qarasty «Naz» memlekettik bı teatrynyń ánshileri, K.Baıseıitova atyndaǵy Qazaq ulttyq óner ýnıversıtetiniń stýdentteri tálimdi is-sharanyń kýási boldy.
Keń kólemde uıymdastyrylyp otyrǵan jıyn túrki halyqtarynyń kórisý ádebin, etnostyq ónerin, salt-dástúrin, túrki halyqtarynyń dástúrli kıimderin qalyń kórermenge áıgilep, etnomádenı murasyn jańǵyrtýdy kózdeıdi.
