Ekologııalyq sana degenimiz – aǵash otyrǵyzý men qoqys jınaýdan áldeqaıda keń uǵym. Ol – qoǵamnyń ózin-ózi tárbıeleýi, bolmysyn baıyptaý, urpaqqa qaldyrar saf tabıǵat. Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» jobasy – osy tárbıeniń jarqyn mysaly der edik.
Aıtýly mádenı is-sharany uıymdastyrǵan «Baıtaq» jasyldar partııasynyń tóraǵasy Azamathan Ámirtaev forýmda sóılegen sózinde bıyl dál bir jyl bolǵan «Taza Qazaqstan» aksııa shyn máninde el kóleminde ulttyq sıpat alyp úlgergenin jetkizdi.
«Taza ekologııa – bul ulttyń densaýlyǵy men bolashaǵy. Tabıǵatty qorǵaý arqyly biz ulttyq bolmysymyzdy, urpaǵymyzdyń amandyǵyn saqtap qalamyz. Bul – ár azamattyń ortaq paryzy», dedi partııa tóraǵasy.
Ekologtyń bul sózi is júzinde qoǵamdyq sanada jańǵyryp, eldiń ár túkpirinen jınalǵan azamattardyń is-áreketimen dáleldendi.
Atalǵan is-sharada Naýryz merekesi toılandy. Iаǵnı, bul ekologııalyq aksııa emes, ulttyq mádenıetti tabıǵatpen ushtastyra otyryp, halyqtyń júregine jol tapqan shara boldy. Onda asyq atý, hantalapaı, arqan tartys syndy ulttyq oıyndar, qolóner kórmesi men sheberlik sabaqtary, sondaı-aq teatrlanǵan kórinister men halyq ánderi – barlyǵy tabıǵat pen dástúrdiń úndestigin pash etti.
Sharaǵa qatysqan zııaly qaýym ókilderiniń sózi de eldiń rýhyn kóterdi. Ańyz aqyn Muhtar Shahanov pen qoǵam qaıratkeri Asyly Osmannyń tabıǵatqa qurmet pen ulttyq sana týraly oılary jınalǵan jurtshylyqqa erekshe áser etti.
Ańyz adam Muhtar Shahanov ózine jabylǵan shapandy Azamathan Ámirtaev baýyryna aǵalyq qurmetpen jaýyp, izgi tilegin jaýdyrdy. Keremet oqıǵanyń kýágeri bolǵan sheteldik qonaqtar men sharaǵa qatysýshylar ininiń aǵaǵa, zamanynyń zańǵar tulǵasynyń inisine qurmetin kórip, yqylas tileýlestigin aıamady.
«Bul – qurmet pen aǵalyqtyń, ulttyq rýh pen parasattyń jarqyn kórinisi. Shahanovtyń bul áreketin naǵyz aǵaǵa tán ulylyq. Shapan jabý – jaı ǵana dástúr emes, ol amanat pen senimniń belgisi», dedi qoǵam qaıratkeri Asyly Osman.
Byltyr bastalǵan «Taza Qazaqstan» aksııasy búginge deıin el kóleminde 6,2 mıllıon adam qatysyp, el tarıhyndaǵy eń aýqymdy ekologııalyq is-shara bolyp tarıhta qaldy. Nátıjesinde 1,1 mıllıon tonna qoqys jınalyp, 1,6 mıllıonnan astam aǵash otyrǵyzyldy. Al zańsyz 4 800 qoqys alańynyń 91 paıyzy joıyldy. Telegram jelisindegi @TazaQazBot arqyly 10,7 myń ótinish túsip, sonyń 9,7 myńy sheshimin tapty. Bul – el azamattarynyń tabıǵatqa degen kózqarasy ózgerip kele jatqanynyń dáleli.
Is-sharaǵa Qyrǵyzstan, О́zbekstan, Mońǵolııanyń jasyldar partııalary men Ortalyq Azııa jáne Eýropa elderinen kelgen resmı ókilderdiń qatysýy – «Taza Qazaqstan» bastamasynyń halyqaralyq deńgeıge kóterilgenin ańǵartady. Bul – Qazaqstannyń tek óz shekarasynda ǵana emes, jahandyq ekologııalyq jaýapkershilikke de atsalysyp otyrǵanyn bildiredi.
Búgingi tańda tabıǵatty qorǵaý – saıasat emes, parasat. Bul – bilim men sananyń, urpaq aldyndaǵy jaýapkershiliktiń, ulttyq mádenıet pen órkenıetti damýdyń toǵysqan tusy.
«Taza Qazaqstan» – bir kúndik senbilik emes. Bul – tutas ómir saltyna aınalýǵa tıis. Sondyqtan bul bastama – ulttyń ózin-ózi qaıta taný jolyndaǵy biregeı qadam. Tabıǵatqa qurmet – ózińe qurmet. Al «Taza Qazaqstan» – sol qurmetti naqty áreketpen kórsetetin jańa býynnyń tynysy, jańa dáýirdiń lebi.
