Ásirese, jańadan qurylǵan yqshamaýdandarda tal-terek otyrǵyzý, balalarǵa arnalǵan oıyn alańdaryn salyp, turǵyndar úshin jaıly da yńǵaıly oryndarǵa aınaldyrý kezek kúttirmeıtin is. Qala ákimi Azamat Beket abattandyrýǵa yqylas bildirgen kásiporyn basshylarymen kezdesýde alleıalar men shaǵyn saıabaqtardy retke keltirýdi tamyz aıyna deıin aıaqtaýdy tapsyrdy.
«Kásipkerler on bir aýmaqty abattandyrýǵa kirispekshi. Janashyrlyq tanytqan azamattarǵa sheksiz alǵysymyzdy bildire otyryp, biz olardan skverler men shaǵyn saıabaqtardy kógaldandyryp, sýarý júıesin quryp, túngi jaryqtandyrý shamdaryn, oryndyqtar, qoqys jáshikterin ornatyp, taqtaıshalar tósep, túrli sáýlettik mazmunda bezendirýdi usynamyz. Skverler sándi ári turǵyndarǵa jaıly bolǵany jón», dedi ol.
Qalanyń «Altyn Orda» yqshamaýdany «Máńgilik el» kóshesindegi bos jatqan alańqaıǵa ótken jyl qaraǵaı kóshetteri otyrǵyzylsa da, kútimsizdigi kórinip tur.
Bul jerdi retke keltirýdi «Zerde Keramıka Aqtóbe» JShS-i moınyna alsa, Mánshúk Mámetova kóshesi boıyndaǵy qaraýsyz alańqaıdy «Álıhan Oıl 3» JShS-i, al Eset batyr turǵyn úı alabyndaǵy mektep pen kópqabatty úıler arasyndaǵy bos aýmaqty «Anvar» saýda jelisi qalypqa keltirmekshi.
Aqtóbe oblysy
