Qazaq balalar ádebıetiniń tarıhy uly ustaz Ybyraı Altynsarınnen bastalyp, búginge deıin aýyspaly tabyspen jalǵasyp keledi. Bir kezde ony dúnıejúzi balalar ádebıetiniń maıtalmandary da joǵary baǵalap, Berdibek Soqpaqbaevtyń «Meniń atym – Qoja» hıkaıaty talaı eldiń tórinen oryn aldy. Búginde bul salaǵa talap joǵary, jas sanalardy eliktiretin zamanaýı IT-diń jasaıtyn básekelestigi orasan. Sanaly ata-analar men salıqaly ustazdardyń qoldaýymen balalardyń ádebıetke degen qushtarlyǵy ólgen joq. Biraq básekelestikke tótep berip, shynaıy, tartymdy, bala psıhologııasyna shaqtalǵan dúnıe jazý ońaı emes. Shý degende balalar ádebıetin ońaı dep oılaǵandar zamana dóńgelegi shabaqtarynyń qaqpaqylyna ushyrap, murttaı ushyp jatty. Al Tolymbek Ábdiraıym sol qaqpaqylǵa tótep berip, 1996 jyly shyqqan alǵashqy kitaby «Erkeshoradan» beri talmaı 30 jylda on bes shaqty jınaq shyǵaryp, eńbegimen elge tanylǵan jazýshy. Onyń balalarǵa arnaǵan «Maqtanshaq sary saǵat», «Ine men jip», «Áýelep ushqan tyrnalar», «Aıý qulaq», «Jalqaýlyqqa kim úıir?», «Alabuǵa aýlaǵan kún», «Aqqoıannyń úıshigi», «Aq kepter», «Letıat jýravlı», t.b. jınaqtaryn oqyrmandary jyly qabyldaǵan. Biraz áńgimeleri oqýlyqtarǵa da engizilgen.
Astanalyq baspalardyń biri «Ardadan» shyqqan 367 bettik «Qus uıasynyń» baspagerlik sheberliginde min joq. Jınaqqa toptastyrylǵan 54 áńgime, 16 ertegi jáne 3 hıkaıattyń bárine oqýshyǵa túrli oı salyp, mátinniń mazmunyn asha túsetin túrli-tústi, ádemi sýretter salynǵan. Áńgimeleriniń bári de kórkemdigi joǵary, taǵlymy zor, balanyń qabyldaýyna yqsham. Belgili ádebıetshi-professor Serik Negımov kitapqa jazǵan alǵysózinde: «Áńgimeleri oımaqtaı, oıýly, syrly, maǵynaly hám mazmundy. Balalardyń janyn keremet túsinedi. Kádimgi Ybyraı Altynsarınniń alaqandaı áńgimeleri bar ǵoı, sol sııaqty», depti.
Tusaýkeser rásimine qyzyljarlyq ádebıetsúıer qaýym qatysty. Ǵalym Zarqyn Taıshybaı T.Ábdiraıym shyǵarmashylyǵyn kópten beri biletinin, onyń qalyptasýy men ósý joldaryna kýá ekenin aıtty. Jazýshy Jarasbaı Súleımenov, kásipker Jomart Omarov, ánshi, akter Qumarbek Qalqataı, aqyn Amanjol Zaǵypar, t.b. kitap avtory jáne jańa jınaq týraly jyly lebizderin bildirdi. 3-synyp oqýshysy, jas aqyn Sarybaı Abzal jazýshyǵa arnaýyn aıtty. «Bala janynyń baǵbany» atalǵan keshti oblystyq «Soltústik Qazaqstan» gazetiniń bas redaktory Nurgúl Oqasheva ashyp, júrgizip otyrdy. Qalamger men onyń jubaıy Kámılá Muqashevaǵa kitaphana ujymy syı-qurmet kórsetip, ıyqtaryna shapan japty. Sóıtip, balalar ádebıetiniń qorjynyna taǵy bir súbeli eńbek jol tartty.
PETROPAVL
