Sýret: lshop.kz
Avtor otbasylyq rásimderge ketetin shyǵyndardyń kólemi men onyń eldegi tutynýshylyq nesıege áserin taldap, otandastarymyzdyń qarjylyq minez-qulqyna qatysty jańasha kózqaras usynady.
Zertteý derekteri oılandyrady: qyz uzatýǵa orta eseppen – 1,7 mln teńge, úılený toıyna – 1,68 mln teńge, jańa úı nemese kólik alǵandaǵy dastarqanǵa – 1,04 mln teńge, mereıtoıǵa – 834 myń teńge, janaza rásimine – 820 myń teńge, al sábıdiń dúnıege kelýine 523 myń teńge jumsalady. Osylaısha, bir otbasy jylyna orta eseppen 1 mln teńgeden astam qarajatty saltanatty is-sharalarǵa jumsaıdy. Bul – qanshama otbasy tabysynyń 30-40%-yn quraıtyn soma.
Darına Mamyrovanyń zertteýinshe, ekonomıkalyq turǵydan saýatty azamattardyń ózi «uıat bolmasyn» degen túsinikpen úlken qaryzǵa barady. Búginde elimizde eresek turǵyndardyń 84%-ynyń nesıesi bar. 1,7 mln adam nesıesin ýaqtyly tóleı almaıdy. 2023 jyldyń naýryzynan bastap 77 myń adam jeke tulǵa retinde bankrot bolýǵa ótinish bildirgen.
Ahýaldyń túp-tórkini – «uıat bolady» degen sanada. Kóp jaǵdaıda adamdar naqty qarjylyq jaǵdaıyna emes, aınalanyń sózine qarap áreket etedi. «Kórshimen teń bolý», «elden qalmaý», «abyroı saqtaý» syndy túsinik kóptegen otbasyny qaryzǵa batyryp, qarjylyq kúıreýge ushyratyp otyr degen baılam jasaıdy avtor.
Jastar salt-dástúrdi qurmettegenimen, onyń arty aýyr qarjylyq salmaqqa aınalǵanda, ondaı dástúrden ishteı alystaı bastaıdy. Olar ata-anasynyń nesıege belshesinen batyp, shildehana men qudalyq úshin dúnıe-múlkin satqanyn kórip ósti. Sonyń saldarynan «dástúr» sózi keıde «qysym» degen maǵynaǵa ıe bolady deıdi ol.
