Áskerı qyzmetshilerdiń arqasynda ata-anasynan adasyp, meken jaıdan jańylǵan 15 bala jaqyndaryna tabystaldy. Ulandyqtardyń qatysýymen 11 órt sóndirý jáne adamdardy qutqarý faktisi tirkelgenin de atap ótken jón. Áskerı jasaq jaýyngerleri 45 adamnyń joǵalǵan zattaryn taýyp, 91 smartfondy ıelerine tabystady. Jaýyngerlik qyzmet barysynda sarbazdar júrek talmasy men demikpesi bar adamdarǵa, jol-kólik apatyna dýshar bolǵan jandarǵa nemese ózine-ózi qol jumsamaq bolǵandar men sýǵa batqan kisilerge der kezinde kómek kórsetip jatady. Úsh aıdyń ishinde Ulttyq ulan áskerı qyzmetshileri 21 adamǵa alǵashqy medısınalyq kómek kórsetti. Budan bólek, túrli quqyq buzýshylyqtarǵa jol bergen 4 938 azamat ishki ister organdaryna jetkizilgen. Olardyń 194-i qylmystyq belgilermen ustalǵan.
Osyndaı nátıjeli qyzmet barysynda belsendilik tanytqan jaýyngerlerge qurmet kórsetildi.
Ishki ister mınıstriniń orynbasary – Ulttyq ulannyń Bas qolbasshysy Ańsaǵan Baltabekov jyldyń alǵashqy toqsanyndaǵy qyzmet qorytyndysy boıynsha birqatar áskerı qyzmetshini marapattady.
«Ulttyq ulan áskerı qyzmetshileri tynyshtyq jolynda tynbaı ter tógip, ishki turaqtylyq pen beıbit kúnniń tiregi bolyp keledi. Sarbazdarymyz adal qyzmetterimen el qaýipsizdigine eleýli úles qosýda. Jaýyngerlerimizdiń jarqyn isteri men qyzmettegi jetistikteri – osyǵan naqty dálel!», dedi general-maıor A.Baltabekov.
Buǵan deıin Astanada 5573 áskerı bóliminiń jaýyngerleri órt shyqqan jataqhanadan 60-tan asa adamdy qaýipsiz jerge evakýasııalap, qaýiptiń aldyn alǵan bolatyn.
«Qyzmet barysynda jaqyn mańdaǵy jataqhanalardyń birinen shyqqan tútindi baıqap, jedel jetip bardym. О́rtenip jatqan ǵımarattyń ishine enip, bastapqy sátte qarttar men balalardy syrtqa alyp shyqtym. Jobamen qaýipsiz aımaqqa 30 shaqty adamdy shyǵardym. Osy kezde ózge de qarýlastarym kómekke keldi. Abyroı bolǵanda, órtten zardap shekkender bolmady. Al búgin qyraǵy qyzmetimiz ben halyqqa kórsetken kómegimiz úshin bizdi Ulttyq ulan Bas qolbasshysy ózi kelip marapattady. Bul men úshin ǵana emes, ata-anam men baýyrlarym úshin de úlken qýanysh», dedi qatardaǵy Jomart Jumabek.
Sondaı-aq naýryz aıynda Oral qalasynda ulandyq sarbazdar jasóspirimdi bir top bozbalanyń álimjettik áreketinen qutqaryp qaldy. Osy oqıǵaǵa uqsas jaǵdaı qańtar aıynda elordada da boldy. Jalpy mundaı mysaldar jetip artylady. Joǵalǵan balalardy tabý, buzaqylar men qylmyskerlerdi quryqtaýdan bólek, esirtki tasymaldaýshylardy ustaýda, adam ómirine arasha bolýda ulandyqtar kásibı sheberlikterimen jıi kózge túsedi.
Jalpy áskerı boryshyn adal oryndaǵany, qoǵamdyq tártip pen qaýipsizdikti qamtamasyz etýde qaısarlyq tanytqany úshin respýblıka boıynsha quqyqtyq tártip áskeriniń 57 jaýyngeri marapattaldy. Olardyń 52-si Ulttyq ulan Bas qolbasshysynyń alǵys hattaryn ıelense, 5 sarbazǵa «Qoǵamdyq tártipti saqtaǵany úshin» keýde belgileri tabystaldy.
Aıta keteıik, quqyqtyq tártip áskeriniń jeke quramy saqshylarmen birlesip elimizdiń 21 qalasynda qoǵamdyq tártipti qadaǵalaıdy. Bul mindetti atqarýǵa kún saıyn ásker boıynsha 8 000-nan asa ulandyq jumyldyrylady.
