Prezıdent janyndaǵy Sheteldik ınvestorlar keńesiniń qyzmeti aıasynda ótken is-sharada Densaýlyq saqtaý vıse-mınıstri Tımýr Muratov, «Sheteldik ınvestorlar keńesi» qaýymdastyǵynyń dırektory Janna Baıdasheva, «Hımfarm» AQ bas dırektory Adam Alekseıýk, Polsha Respýblıkasynyń Qazaqstandaǵy ýaqytsha senimdi ókili Mıhal Labenda, ózge de mamandar qatysyp, dári-dármekpen qamtamasyz etýde júıeli sheshimder ázirleý, jergilikti óndiristi damytý jáne memleket pen jekemenshik sektor arasyndaǵy áriptestikti nyǵaıtý máselelerin talqylady.
Densaýlyq saqtaý vıse-mınıstri T.Muratov óz sózinde halyqty dári-dármekpen qamtamasyz etý – densaýlyq saqtaý salasyndaǵy negizgi mindettiń biri ekenin jetkizdi. Onyń aıtýynsha, qazirgi turaqsyzdyq jaǵdaıynda kóp memleket, sonyń ishinde AQSh pen Eýropa elderi dári-dármek qaýipsizdigin memlekettik saıasattyń mańyzdy elementi dep qarastyryp otyr.
«Sheteldik ınvestorlar keńesi» qaýymdastyǵynyń dırektory J.Baıdasheva densaýlyq saqtaý sektory ókilderiniń kúshin biriktirip, jergilikti óndiristi damytý, otandyq kompanııalarmen tıimdi áriptestik tetikterdi qalyptastyrý jáne ádil de teńgerimdi patenttik saıasat júrgizýdiń mańyzyn atap ótti. «Biz dári-dármekti memleket esebinen satyp alǵanda edáýir negizdi sheshim qabyldaýǵa múmkindik beretin medısınalyq tehnologııalardy saraptaý (HTA) sekildi quraldarǵa erekshe nazar aýdaramyz. Ortaq maqsatymyz – ómirlik mańyzy bar ári sapaly dári-dármek eldiń kez kelgen óńirine, qajet ýaqytynda jáne ádil baǵamen jetip, oǵan turǵyndar qol jetkize alǵanyn qamtamasyz etý. Memleket, bıznes pen sarapshylar arasyndaǵy mundaı dıalog – Qazaqstan farmasevtıka sektoryn ornyqty, ınnovasııa men ınvestısııa turǵysynan tartymdy etýde taptyrmas qural. Mundaı pikir almasý eldiń, azamattardyń jáne strategııalyq seriktesterdiń múddesin kózdeıtin uzaq merzimdi sheshimder qabyldaýǵa negiz bolady dep senemiz» dedi ol.
Dóńgelek ústelde aıtylǵan taǵy bir mańyzdy másele – dárihana jelilerine dári-dármek jetkizý problemasy. Qatysýshylar Eýrazııalyq ekonomıkalyq odaq sheńberinde dári-dármekti tirkeý prosedýralaryna baılanysty týyndap jatqan qıyndyqtardy atap ótti. Máselen, 2025 jyldyń aıaǵyna deıin 2 myńǵa jýyq dári EAEO aıasynda tirkeýdi kútip tur. Osyǵan oraı qatysýshylar Úkimetke pasıentterdi qajetti dári-dármektermen qamtýdaǵy irkilisterge jol bermeý úshin ótpeli kezeń engizý múmkindigin qarastyrýdy usyndy.
