Sotqa elimizdiń barlyq BAQ ókiline qatysýǵa ruqsat berildi. Memlekettik prokýrorlar sottalýshylardyń tizimin aıtyp, oqıǵanyń mán-jaıyn tolyq baıandap berdi.
«Qylmysqa qatysy bar kúdiktiler Taldyqorǵandaǵy ýaqytsha oqshaýlaý ornynda bolǵandyqtan sot otyrysy osy qalada ótip jatyr. Aıyptalýshylar arasynda kámelet jasyna jetpegen kúdikti bar. Sondyqtan jýrnalıster tarapynan qatty qysym túsirmegenimiz abzal. Sot bastan-aıaq ashyq túrde ótetindikten sot otyrysyn onlaın kórseńizder de bolady», dedi Joǵarǵy sottyń kommýnıkasııa bóliminiń meńgerýshisi Perızat Sadýaqas-Haırýllına.
«Adam óltirý», «buzaqylyq», «qorqytý» jáne «qylmys týraly habarlamaý» baptary boıynsha qozǵalǵan qylmystyq isterdi Almaty oblysynyń polısııa departamenti tergegen. Qylmystyq is 62 tomnan turady. Is materıaldarynda 40 sot saraptamasy, shamamen 200 kýágerdiń jaýaby jáne qosymsha segiz beınematerıal qamtylǵan.
«Sot otyrysyna qatysýshylardyń pikirlerin eskere otyryp, sot bul is boıynsha sot talqylaýyn ashyq rejimde ótkizý týraly sheshim qabyldady. Sot otyrysynyń onlaın translıasııasyn Joǵarǵy sottyń YouTube-arnasynda erkin kórýge bolady», dep habarlady Joǵarǵy sot ókili.
Jábirlenýshi taraptyń múddesin sotta advokat Meıirman Shekeevtiń zań keńsesi qorǵaıdy. Qorǵaý tobyna Jandos Palmanov, Álim Mustafaev, Dına Dosaeva, Nurbolat Ybraev, Baǵdat Amandosuly jáne Bekzat Mıazov esimdi mamandar kirgen. Alaıda sot otyrysyna sottalýshylardyń qorǵaýshylary tolyq kelmedi. Joldyń alystyǵyn aıtyp, aldyn ala onlaın qatysýǵa ótinish jibergenimen, oǵan sýdıa úzildi-kesildi qarsy boldy. Degenmen sottalýshy Abzal Shynasyldyń anasy qoǵamdyq qorǵaýshy retinde qatysý quqyǵyna ıe boldy. Odan bólek, qorǵaýshy tarap kelesi otyrysty Qaskeleń qalasynda ótkizýdi surady. Bul suranysty da sýdıa qanaǵattandyrmady. Sebebi Qaskeleń qalasynda tergeý ızolıatory joq.
«Qylmysqa qatysy bar azamattardyń keıbirine jeńil jaza taǵaıyndalýy múmkin. Sebebi qaralyp jatqan baptar boıynsha eki adam ǵana qasaqana kisi óltirý isine qatysqan. Al qalǵany buzaqylyq jasaǵandar retinde tirkelip otyr. Bul sheshim kópti alańdatyp otyr. Sot ádil bolady dep oılaımyz», deıdi qoǵam belsendisi Arnur Berenbaev.
Atalǵan is boıynsha sotqa deıingi tergeý áli jalǵasyp jatyr. Bas prokýrordyń orynbasary Ǵalymjan Qoıgeldıev Sherzat Bolattyń úıiniń órtenýine qatysty tergeýdiń jańa málimetterin jarııalady.
«Saraptamalar keń aýqymda júrgizildi. Bul saraptamalardyń belgili bir nátıjeleri bar. Biz Reseı Federasııasyna halyqaralyq tergeý buıryǵyn jiberdik», deıdi prokýror Ǵ.Qoıgeldıev.
Kelesi sot otyrysy 17 sáýirde oblystyq qylmystyq ister jónindegi mamandandyrylǵan aýdanaralyq sotynyń ǵımaratynda ótedi.
Jetisý oblysy
