«Sıfrlyq kóshpeliler» degen uǵym keıingi jyldary paıda boldy. Bul – álemniń kez kelgen jerinde turyp, sıfrlyq tehnologııa salasynda qashyqtan jumys isteıtin mamandar. Sessııa barysynda tartymdy on eldiń qataryna enýge umtylǵan halyqaralyq reıtıngti zertteýge nazar aýdaryldy. Buǵan strategııalyq bastamany júzege asyrý arqyly qol jetkizýge bolady. Mysaly, «Digital Nomad Visa» –12 aıǵa beriletin elektrondyq vıza, ol kóp márte vıza alý jáne yqtııarhatqa ótinish berýdi qarastyrady. Sondaı-aq «Digital Nomad Residency» – sheteldik IT-mamandarǵa yqtııarhatty alýǵa jeńildetetin onlaın qural.
«Biz elimizde jumys isteıtin halyqaralyq IT-mamandaryna qolaıly jaǵdaı týdyrsaq deımiz. Jańa bastamanyń arqasynda sheteldik mamandar otandyq jáne sheteldik kompanııalarmen erkin jumys isteıdi. Sondaı-aq jergilikti IT-ekojúıege ıntegrasııalanýǵa múmkindik alady. Biz árbir «sıfrlyq kóshpelige» jan-jaqty qoldaý kórsetemiz. Maqsatymyz – IT-mamandardy tartý ǵana emes, sonymen qatar olardyń elimizde kásibı jáne iskerlik ósýine jaǵdaı jasaý», deıdi «Astana Hub» qatysýshylardy qoldaý ofısiniń dırektory Talǵat Maratov.
«Digital Nomad Residency» qanatqaqty jobasy aıasynda AQSh, Kanada, Grekııa jáne TMD elderinen kelgen úmitkerlerdi qosa alǵanda, birneshe ótinim qabyldandy. Aıta keteıik, elimiz IT-mamandarǵa birqatar tıimdi múmkindik usynady. Máselen, tabys deńgeıin rastaıtyn talap bolmaıdy, ótinimdi onlaın tapsyrady jáne elimizde uzaq ýaqyt tura alady.
Qaısar Qusaıyn
