Sharýasy shıraq shyraıly shahar

Birqatar nysandy aralady

Prezıdent eń aldymen Shymkent áýejaıynyń jańa termınalymen tanysty. Memleket basshysynyń qalany damytý jónindegi tapsyrmasy aıasynda salynǵan áýe aılaǵynyń qurylysyna jeke ınvestor 24 mlrd teńge qarajat jumsaǵan.

Prezıdentke Qazaqstannyń ońtústiginde biregeı avıasııalyq hab qalyptastyrý óńirdegi áýe qatynasynyń baǵyt sanyn 17-den 59-ǵa deıin ulǵaıtýǵa, sondaı-aq Eýropa men Azııanyń birqatar eline reıster ashýǵa múmkindik beretini jóninde baıandaldy.

Budan keıin Memleket basshysy strategııalyq mańyzy zor Batys Qytaı – Batys Eýropa kólik dálizine jaqyn ornalasqan «Almaar Logistics» saýda-logıstıka ortalyǵyna bardy. Aýmaǵy 24 myń sharshy metrdi quraıtyn kópfýnksıonaldy keshen qurylysyna jeke ınvestor 14,8 mlrd teńge qarjy quıǵan. Ortalyq ónim saqtaýdyń ozyq tehnologııasymen jabdyqtalǵan. Atap aıtqanda, tez buzylatyn azyq-túlikti uzaq saqtamaı, barynsha jedel taratýǵa múmkindik beretin júıe engizilgen.

Sonymen qatar Prezıdent aýyl sharýashylyǵy ónimderiniń kórmesin aralap kórdi. Qaladaǵy 50-ge jýyq óńdeýshi kásiporyn byltyr 168,5 mlrd teńgeniń ónimin shyǵarǵan.

Qasym-Jomart Toqaevqa jylyjaı keshenderin salý­ǵa túr­kııalyq «Alarko Holding» kom­panııasy – 650 mln dollar, al Polshanyń «Fabe Polska SP» kásiporny 136 mln dollar kóleminde ınvestısııa quıýǵa nıetti ekeni aıtyldy.

Prezıdent Shymkentke jumys sapary aıasynda jańa­dan ashylǵan «Coca-Cola Içecek Kazakhstan» zaýytyn da aralap kórdi. Ozyq tehnologııalarmen jabdyqtalǵan jáne avtomattandyrý deńgeıi óte joǵary kásiporyn jylyna 283 mln lıtr­ge deıin sýsyn shyǵara alady.

Memleket basshysy óndiris barysymen tanysqan soń, óńirdiń ekonomıkalyq ósimine serpin beretin iri ınvestısııalyq jobalardy qoldaýdyń mańyzyn atap ótti.

Sodan soń Qasym-Jomart Toqaev «Shymkent City» shaǵyn aýdanyna jaqyn mańdaǵy jańa saıabaqqa bardy. Aýmaǵy 20 gektardan asatyn parkte seıildeýge jáne mádenı-kópshilik is-sharalar ótkizýge barlyq jaǵdaı jasalǵan. Sýburqaqty jasandy toǵan, amfıteatr, landshafty alleıalar, vorkaýt jáne skeıt alańdary bar.

Prezıdent saıabaq aýmaǵynda aǵash otyrǵyzdy. Qazirgi kezde Shymkentte adam basyna shaq­qanda 4 sharshy metrge jýyq jasyl jelekten keledi eken. Eko­logııa­lyq jaǵdaıdy jaq­sartyp, qala tur­ǵyndaryna qolaı­ly orta qa­lyptastyrý úshin al­daǵy jyl­­dary 1 mln túpten asa aǵash kósheti otyr­ǵyzyl­maq. Sha­har­daǵy 12 saıabaqt­y abat­tan­­dyrý, sondaı-aq gúl­zar­lar­dy, Qosh­qar ata ózeni­niń jaǵa­laýy men aryqtardy tazalaý jumys­tary júrgizilip jatyr. Burynǵy qo­qys polı­gonynyń ornynda Eko­park qurylysy qolǵa alyndy.

Buǵan qosa Prezıdentke qytaılyq «Shaanxi Construction Engineering» kompanııasy usynǵan qoqys órteý zaýytynyń jobasy tanystyryldy. Zaýyt táýligine 1 myń tonnaǵa deıingi qatty tur­mystyq qaldyqtardy qaıta óńdep, elektr energııasyn óndire alady.

Sonymen qatar Memleket basshysy «Tulip Hall» kópfýnksıonaldy kesheni­ne bardy. Kongress-holl ǵımaraty ótken jyly maýsym aıynda paıdalanýǵa berilgen. Prezıdent tapsyrmasyna sáıkes boı kótergen bul kórikti nysan buqara­lyq mádenı is-sharalar ótkizýge arnal­ǵan. Munda sondaı-aq qolónershilerdiń ortalyǵy men sheberhanalary ornalasqan.

Memleket basshysy Shymkentte júzege asyrylyp jatqan sıfrlyq sheshimdermen tanysty. Olardyń qatarynda otandyq «SMEÝ Astana» ázirlemesine negizdelgen baǵdar­shamdardy ıntellektýaldyq bas­qarý júıesi, «Avtobys» sıfrlyq plat­for­ma­sy bar. «Sergek Group» jáne «Freedom Telecom» kompa­nııalarymen birge «FWA 5G» tehnologııasy negizinde jumys isteıtin, jol qozǵalysy men qoǵamdyq tártipke úzdiksiz monıtorıng júrgizetin syrtqy beınebaqylaý jáne jyldamdyǵy joǵary ınternet júıesi engizilip jatyr.

Qalanyń bolashaqtaǵy qurylys jospary

tanystyryldy

Memleket basshysyna qalanyń sáýlettik kelbetin jaqsartyp, turǵyn úı-kommýnaldyq sharýashylyǵyn damytý baǵytynda atqarylyp jatqan jumystar jóninde málimet berildi.

Qasym-Jomart Toqaev 2022 jyly Shymkent jurtshylyǵymen kezdesý barysynda shahardyń bas josparyn qaıta qarap, kólik-logıstıka ınfraqurylymy men ınjenerlik jelilerin jańǵyrtý týraly tapsyrma bergen edi.

Memleket basshysyna qaladaǵy Ortalyq stadıonnyń, perınataldyq orta­lyqtyń, paralımpıadashylarǵa arnal­ǵan sport kesheniniń, mektepterdiń jáne taǵy da basqa áleýmettik nysandar quryly­synyń bolashaqtaǵy jobalary kórsetildi.

Prezıdentke jekemenshik turǵyn úı keshenderiniń beıbereket ósýine shekteý qoıyp, 2035 jylǵa deıin kópqabatty úılerdiń úlesin 60 paıyzǵa jetkizý jospary jóninde baıandaldy.

Bıyl shamamen 1,4 mln sharshy metr baspanany paıdalanýǵa berý kózdelgen. Onyń ishinde 320 myń sharshy metrden asa páter memlekettik bıýdjet esebinen salynady. Qalada jańadan «Aqjaıyq», «Bozaryq» jáne «Turan» shaǵyn aýdandary paıda boldy.

Memleket basshysy «Aqjaıyq» shaǵyn aýdanyndaǵy turǵyn úı keshenin arnaıy baryp kórdi. Bul jerde jyl sońyna deıin 35 turǵyn úı kesheni boı kótermek. Baspanalar áleýmettik turǵydan az qamtylǵan azamattarǵa beriledi, sondaı-aq memlekettik ıpoteka baǵdarlamalary arqyly satylady.

Sonymen qatar Qasym-Jomart Toqaevqa eski úılerdi buzý jumystary jóninde baıandaldy. Renovasııa baǵdar­la­masy aıasynda búginge deıin 248 otbasy apat aldyndaǵy úılerden jańa baspa­na­larǵa kóshirilgen. 2029 jylǵa qaraı bul kór­set­kishti 604-ke deıin jetkizý kózdelip otyr.

Igiligi mol ındýstrııalyq aımaq

Sodan soń Prezıdent «Tassaı» ındýstrııalyq aımaǵyn aralap kórdi. Qasym-Jomart Toqaevqa ındýstrııalyq aımaqta jalpy ınvestısııa somasy 44,5 mlrd teńge bolatyn 33 kásiporyn ashylǵany jóninde baıandaldy. Sonymen qatar munda qosymsha 800-ge jýyq jumys ornyn qamtamasyz etetin 9 ınvestısııalyq joba iske asyryla bastady.

Memleket basshysy jeńil ónerkásip, mashına jasaý, qurylys jáne jıhaz óndi­ri­siniń ónimderi qoıylǵan kórmemen tanysty.

Sondaı-aq Prezıdentke «Aksa Enerji Üretim A.Ş» kompanııasynyń ınves­tısııalyq quny 350 mlrd teńge bolatyn bý-gaz elektr stansasynyń qurylysy týraly málimet berildi.

Budan keıin Qasym-Jomart Toqaev TMD naryǵyna avtotransformatorlar, maımen isteıtin kúshtik transformatorlar men reaktorlar shyǵaratyn «Asia Trafo» zaýytynyń óndiristik jelisin aralap kórdi.

Memleket basshysyna «Marai E7 Group» óndiris alańynyń qyzmeti tanystyryldy. Kásiporyn travmatologııa hırýrgııasynda jáne osteosıntezge keńinen qoldanylatyn dáke men tıtan ımplanttaryn shyǵarýǵa mamandanǵan.

Sondaı-aq Prezıdentke Shymkentte shyǵatyn dári-dármekter men medısınalyq buıymdardyń túrleri kórsetildi. Búginde shyraıly shahar otandyq farmasevtıka salasynyń damýynda eleýli ról atqarady. Munda 19 kásiporyn jumys isteıdi. Onyń ishindegi eń irisi – «Hımfarm» zaýyty.

Jumys saparynyń sońyn ala Mem­leket basshysy Shymkentke sapary barysynda №2 Oqýshylar saraıymen tanysty. Zamanaýı qosymsha bilim ortalyǵynda mýltımedııalyq synyptar, zerthanalar, shyǵarmashylyq stýdııalary, kovorkıng aýmaqtary qarastyrylǵan. Munda erekshe qajettiligi bar balalar da emin-erkin bilim alady. Nysan Prezıdenttiń 2022 jyly qalaǵa kelgen kezinde bergen tapsyrmasyna sáıkes salynyp, paıdalanýǵa berilgen.

Búginde Oqýshylar saraıynda 5 myń­ǵa jýyq bala alty baǵyt boıynsha 65 úıir­mege qatysady. Bilim baǵdarlamasy jan-jaqty damyǵan, jańasha oılaıtyn ári shyǵarmashylyq qabileti zor tulǵa qalyptastyrýǵa baǵyttalǵan.

Memleket basshysy ortalyqpen tanysyp shyqqan soń, oqýshylarmen áńgimelesti.