Atalǵan sharaǵa RHIHUA halyqaralyq bilim berý tehnologııalyq ortalyǵynyń arnaıy shaqyrýymen Abaı atyndaǵy Qazaq ulttyq pedagogıkalyq ýnıversıtetinen rektordyń keńesshisi, Baspasóz qyzmetiniń jetekshisi Nurbek Baıbosynov pen Fılologııa fakýlteti qytaı tili jáne qytaıtaný kafedrasynyń meńgerýshisi Gýlııa Alıhanqyzy qatysyp jatyr.
Halyqaralyq bilim berý kórmesi aldynda (CIEET 2025) «Sapa, senim jáne qaýipsizdik: sheteldegi bilim berýdiń turaqty ári ornyqty damýy» atty halyqaralyq forým ótti. Oǵan álemniń 200-den astam joǵary oqý ornynan kelgen myńnan astam delegat qatysty.
Forým negizinen stýdentterge halyqaralyq bilim berý salasyndaǵy úsh negizgi element – sapa, basqarý jáne qaýipsizdikke nazar aýdaryp, bilim berý júıesin jaqsartýdy, stýdentterdi baǵalaý júıesin, stýdentterdiń qaýipsizdigin, oqý men jumysty baılanystyrýdy talqylaıdy. Sonymen qatar bilim almasýdaǵy qıyndyqtardy sheshýdi, jahandyq bilim berý basqarýyna qatysýdy nyǵaıtýdy kózdeıdi.
Qytaı Halyq Respýblıkasynyń Bilim mınıstrliginiń qoldaýymen CIEET shetelde bilim berý bastamalarynyń sapaly damýyna yqpal etýge, sondaı-aq Qytaıdyń bilim berý salasyndaǵy ashyqtyǵyn jedeldetýge jáne keńeıtýge baǵyttalǵan mańyzdy shara sanalady. Al halyqaralyq bilim berý kórmesin (CIEET 2025) dástúrli túrde Qytaıdyń Ǵylymı almasýǵa qyzmet kórsetý ortalyǵy (CSCSE) uıymdastyryp keledi. Bul kórme Qytaıdaǵy eń yqpaldy jáne aýqymdy halyqaralyq bilim berý kórmeleriniń biri bolyp esepteledi.
CIEET-2025 kórmesi Qazaqstan men Qytaı arasyndaǵy bilim berý salasyndaǵy yntymaqtastyqty odan ári keńeıtýge, eki eldiń bilim men ǵylymnyń damýyna yqpal etýge jáne Abaı ýnıversıtetiniń bilim salasyndaǵy myqty jaqtaryn kórsetýge jáne sheteldik talapkerlerdi tartýǵa múmkindik beredi.
Ǵylymı almasýǵa qyzmet kórsetý ortalyǵynyń ókilderi men kórmeni uıymdastyrýshylar Abaı ýnıversıtetine osy is-sharaǵa qatysqany úshin arnaıy alǵysyn bildirdi.
Aıta keteıik, Abaı atyndaǵy Qazaq ulttyq pedagogıkalyq ýnıversıtetiniń Fılologııa fakýltetindegi qytaı tili jáne qytaıtaný kafedrasynyń «Shyǵys jáne aǵylshyn muǵalimi» mamandyǵy boıynsha qazirgi ýaqytta 118 stýdent, al «Shetel tili: eki shetel tili» mamandyǵy boıynsha 173 bilim alýshy oqyp jatyr.
