Mekemedegi mamandardyń aıtýynsha, mundaǵy jádigerlerdiń birqatary erte jáne orta ǵasyrlarǵa tıesili kórinedi. IH-HII ǵasyrlardyń kózindeı bolǵan jádigerlerdiń ishinde qoladan jáne qyshtan jasalǵan tórt bilteli shyraǵdandar da bar.
«2011–2017 jyldar aralyǵynda Ejelgi Taraz qalasynyń aýmaǵynda júrgizilgen arheologııalyq qazba jumystarynyń nátıjesinde qyshtan jáne qoladan jasalǵan ortaǵasyrlyq shyraǵdandar tabyldy. Jádigerlerdiń tarıhy erte dáýirden bastalady.
Ejelgi Taraz qalashyǵy aýmaǵynan tabylǵan qola shyraǵdandardy tek aqsúıek, baqýatty otbasylar ǵana paıdalanǵan degen derek bar. Sebebi olardyń jasalý tehnıkasyna qaraı quny da joǵary bolǵan degen boljam aıtylady. Bir tańǵalarlyǵy, ósimdik oıý-órnegimen áshekeılengen bul jádigerlerge qarap otyryp, orta ǵasyrlarda da qazaq jerinde sáýlet óneriniń erekshe damyǵanyn ańǵarý qıyn emes.
Tuǵyrly qola shyraǵdandar dinı salttar men kúndelikti turmysta qoldanylǵan kórinedi. Máselen, keıbir shyraqtardyń bıiktigi bir metrge deıin jetedi. Atalǵan shyraǵdandardyń barlyq bólikteri bezendirilip, órnektermen jáne arab áripterimen áshekeılengen. Bul dúnıeler sol dáýirlerde de óńirde sáýlet ónerimen qatar, jazý mádenıetiniń de qalyptasqanyn aıǵaqtaıdy», deıdi «Ejelgi Taraz» memlekettik tarıhı-mádenı mýzeı qoryǵynyń qor saqtaý jáne esepke alý bóliminiń basshysy Ulbosyn Álimhanova.
Taraz
