Sýret: kun.uz
Byltyr jeltoqsanda Kásipkerlik jáne ındýstrııalyq-ınnovasııalyq damytý basqarmasynyń basshysy Aspandııar Seısebaev 2024 jyldyń II toqsannyń qorytyndysynda oblysqa 21,7 mln dollar tikeleı sheteldik ınvestısııa tartyldy dep málimdedi. Arada bir aı ótken soń Prezıdent Jambyl oblysynda tikeleı sheteldik ınvestısııa úlesi tómendegenin tilge tıek etti. Jambyl oblysynyń ákimi Erbol Qarashókeev sheteldik ınvestısııa tartýǵa belsene kiriskenimen, óńirdegi is ónbeı tur. Salaǵa jaýapty laýazymdy azamattar tıisti jumysty durys úılestire almaǵandaı kórinedi.
Aspandııar Seısebaevtyń jyl sońyndaǵy baıandamasyna taǵy bir úńilsek, Qytaı saparynda áńgimege arqaý bolǵan Baızaq aýdany aýmaǵynda traktor qurastyrý jobasy týraly lám-mım demeıdi. Dál osy másele biraz ýaqyt buryn jergilikti máslıhat sessııalarynyń birinde de kóterilgen bolatyn. Depýtattardyń biri áńgimege arqaý etken sharýa týraly jyl sońynda tolyqqandy málimet beriler dep edik. Baıandama ishinde ol da joq bolyp shyqty.
О́ńir basshysynyń Qytaıǵa barǵan kezde sheteldik ınvestorlar tartýǵa basa nazar aýdarǵany talas týdyrmaıdy. Alaıda ákim bastaǵan jumysty basqa jaýapty azamattar júıeleýi, júzege asyrýy kerek emes pe? Qytaıda qoıyn dápterge túrtilgen jobalardyń taǵdyry bizdi de qyzyqtyrady, tolǵandyrady. Alaıda oǵan bas aýyrtyp jatqandar shamaly sekildi. Áıtpese, traktor qurastyrý jobasy boıynsha qandaı kelisimder júrgizilgeni, jobanyń qashan bastalyp, qashan aıaqtalatyny, ınvestorlarǵa qandaı jaǵdaı qarastyrylyp jatqany jarııa etilýi kerek qoı? Álde qolǵa alynýǵa tıis bolǵan, BAQ-ta jarııalanǵan jobalardyń sońy sıyrquıymshaqtanyp ketti me? Ol jaǵy ázirge belgisiz bolyp tur.
Bıyl oblys ákimi bastaǵan top Túrkııanyń Mersın provınsııasyna at basyn buryp, ınvestısııalyq forýmǵa qatysyp qaıtty. Túrkııa sapary kezinde oblys basshysy isker top ókilderine óńirdiń ınvestısııalyq múmkindigin tanystyrypty. Mersınniń ındýstrııalyq-ónerkásiptik aımaǵyn aralaǵan jambyldyqtar irgeli óndiristermen tanysyp, birlesken kásiporyndar qurý máselesin jan-jaqty talqylaǵan kórinedi.
Bir qaraǵanda, ınvestorlarmen kelissóz júrgizý oıdaǵydaı sekildi kórinedi. Oblys ákimi jyl ishinde ondaǵan sheteldik ınvestormen kezdesip, olarǵa qoldaý kórsetiletinin aıtady. Sondaı-aq ınvestısııalyq jobalardy súıemeldeıtin «Zhambyl Invest» dıreksııasy da bar. Olar da qoldan kelgenshe qamdanyp jatyr. Soǵan qaramastan, ótken jyly óńirge tikeleı sheteldik ınvestısııa tartý kórsetkishi tómendegeni kóńilge kirbiń túsiredi. Derekke sensek, «Zhambyl Invest» dıreksııasynda túrkııalyq ınvestorlarmen tikeleı jumys isteıtin arnaıy bólim de bar eken.
Jaýapty basqarma osy jyly ındıkatordy oıdaǵydaı oryndaı ala ma? Álde bıyl da sheteldik ınvestısııa tartý kórsetkishi kemshin túse me? Kim bilsin... Qalaı bolǵan kúnde de Prezıdent nazaryndaǵy máseleniń oıdaǵydaı oryndalmaýy eshkimge abyroı ápermesi anyq.
Jambyl oblysy
