Joba aıasynda qatysýshylar ár apta saıyn ónerkásip oryndarynyń jumysyn kózben kórip, óndiristik mamandyqtardyń qyr-syrymen tanysady. Osy maqsatta Almaty qalasynyń stýdentteri «Asfaltbeton» zaýytyna bardy. Onda jastar óndiris jelisimen tanysyp, materıaldardyń jasalý jolyn, arnaıy tehnologııalardyń maqsat-mindetin bilip qaıtty. Ashyq alańda eńbek etip júrgen naǵyz jumysshy mamandarmen áńgimelesti.
– Tájirıbelik kezdesýler jastardyń kásibı baǵdaryn aıqyndap, qarapaıym mamandarǵa degen qurmetin arttyrady. Eńbektiń parqyn túsinedi. Tehnologııalyq prosessti tikeleı baqylaı, kásibı qupııalardy meńgeredi, zaýyttaǵy jumys múmkindikterinen qulaǵdar bolady. Osylaı baǵyt-baǵdar berip, azamattardyń óz jolyn tabýyna, zamanaýı tehnologııalardy meńgerýine, jańa ıdeıalardyń bastamashy bolýyna úles qosqymyz keledi. Esesine olar el ekonomıkasynyń ilgerileýine negiz bolady. Jastar qanatynyń da mindeti osy, stýdentterge jumysqa ornalasýǵa ońtaıly jolyn kórsetý, – deıdi Almaty qalalyq «Jastar rýhy» tóraǵasy Dıdarbek Dildábek.
Qyzylorda oblysyndaǵy «Ádilet» óndiris kompanııasyna ekskýrsııa barysynda jastar naýbaıhana, sabyn men kir jýýǵa arnalǵan untaq shyǵarý bólimderiniń jumysymen tanysty. Bul óndirýshi kompanııa 72 paıyzdyq kir sabynnyń kúnine 1000 danasyn, «Aqnıet» kir jýý untaqtarynyń aıyna 6 tonnasyn jáne ottegegi aǵartqyshynyń 1 tonnasyn óndiredi. О́nimderi tek qala turǵyndaryna ǵana emes, respýblıkaǵa jóneltilip jatyr.
– Biz úshin mundaı kezdesýlerdiń orny bólek. Sebebi, bul tek aqparat almasý emes, jastarǵa shabyt syılap, olardy óndiris salasynyń shynaıy kelbetimen tanystyrý múmkindigi. Kásibimizdiń qyr-syryn, jumys barysyn kórsetip, olardyń kásibı baǵdar alýyna kómektesý, – deıdi «Ádilet» dara kásipkerliginiń tehnolog mamany Baǵdat Shýlenbaev.
Qostanaılyq stýdentter de «Sokolov-Sarybaı taý-ken baıytý óndiristik birlestigine» baryp qaıtty. Jalpy kásiporyn elimizdiń metallýrgııa salasynda mańyzdy ról atqarady. Búginde ónimderi álemniń birneshe memleketine jiberiledi.
Al Almaty oblysy Qonaev qalasynyń kópsalaly kolledjiniń jastary Qazaqstandaǵy jalǵyz antıfrız óndirýshi «Baǵashar meken» JShS zaýytyna óndiristik ekskýrsııa jasady. Is-shara aıasynda kolledj, zaýyt jáne «Jastar rýhy» uıymy úshjaqty memorandýmǵa qol qoıdy. Qujat stýdentterdiń óndiristik tájirıbeden ótýine jáne úzdikterdiń jumysqa qabyldanýyna múmkindik beredi.
