Foto: Mańǵystaý oblysy ákiminiń baspasóz qyzmeti
Keme zamanaýı ozyq quraldarmen jabdyqtalǵan. Qurǵaq jáne barlyq derlik júk túrlerin tasymaldaýǵa arnalǵan. Onyń júk kótergishtigi – 7 000 tonna, uzyndyǵy – 136 metr, bıiktigi – 7 metr. Jańa sý kóliginiń tusaýkeser rásiminde otandyq «Semurg Invest» pen «Freeseas Container Shipping» kompanııalary Kaspıı teńizinde jańa kemelerge ınvestısııa tartý týraly memorandýmǵa qol qoıdy. Onda keme sanyn 6 birlikke deıin arttyrý josparlanǵan.
Aqtaý teńiz saýda porty da jaǵymdy jańalyqtan qur alaqan emes. Bul portta da tarıhı oqıǵa oryn aldy. Portqa Azııa ınfraqurylymdyq ınvestısııalar banki jáne kólik pen energetıka salasyndaǵy konsýltasııalyq qyzmetterge mamandanǵan CPCS Transcom Limited ınfraqurylym jónindegi kanadalyq konsaltıngtik kompanııanyń ókilderi keldi.
CPCS Transcom Ltd budan ári ınvestısııalaý úshin Ortalyq Azııadaǵy transshekaralyq qosylý jobalaryn anyqtaý men olardyń qarjylyq tartymdylyǵyn egjeı-tegjeıli baǵalaýǵa Qazaqstandy qosa alǵanda, iske asyrý týraly máseleni qaraý maqsatynda zertteýler júrgizedi. Basym joba qatarynda Kaspıı teńizi deńgeıiniń tómendeý saldaryn jeńildetýge Qazaqstan porttarynda josparlanǵan túbin tereńdetý jumystary bar.
Oǵan qosa Lıtvadaǵy Klaıpeda portynyń delegasııasy da Aqtaý portynda bolyp, qyzmetimen tanysty. Klaıpeda Baltyq jaǵalaýyndaǵy eń úlken tereń teńiz porty jáne jylyna 70 mıllıon tonna jınaqtalǵan 33 port termınalyn qamtıtyn teńiz aılaǵy.
Munymen birge Nıderlandııa dıplomatııalyq korpýsy men negizgi kompanııalarynyń basshylary da issaparmen Aqtaý portyna kelip, TMTM múmkindikterimen tanysty. Kezdesýde TMTM dáliziniń damý baǵyttary, Kaspıı arqyly Eýropa men Azııa arasyndaǵy taýar aınalymynyń ósý perspektıvalary áńgime arqaýyna aınalyp, aldaǵy boljamdar sóz boldy.
