Kollajdy jasaǵan – Amangeldi Qııas, «EQ»
Elimizde salyq júıesi qaıta jańǵyryp jatyr. Ulttyq ekonomıka mınıstri Serik Jumanǵarın salyq salý salasyna serpin beretin birneshe mańyzdy ózgeristi aıtty. Eń basty jańalyq – salyq eseptiligi 30%-ǵa qysqarady. Bul kásipkerlerge «tynys alý» múmkindigin beredi: buryn toltyratyn qaǵaz-qujat azaıady, esep berý jeńildeıdi. Sondaı-aq salyq organdary kásipkerge kemshiligin aıtyp, birden aıyppul salmaıdy. Iаǵnı tekserý eskertý sıpatynda júrgiziledi. Qatelesseń – túzetýge múmkindik bar.
– Bul rette salyq eseptiligi 30%-ǵa qysqarady. Biz kameralyq baqylaý tásilderin túbegeıli ózgertýdi usynamyz. Eger qazir bul baqylaý tásili bolsa, onda bolashaqta bul úderis buzýshylyqtardy joıý salasynan sáıkessizdikter anyqtaý salasyna aýysyp, eskertý sıpatyna ıe bolady. Salyq bereshegin májbúrlep óndirip alý tásilderi de ózgeredi, – dedi mınıstr.
Taǵy bir jaqsy jańalyq – shaǵyn jáne orta bızneske arnalǵan arnaıy salyq rejimi jeńildetiledi. Buryn kásipker qyzmetker sanyn asyryp alsa, avtomatty túrde júıeden shyǵyp qalatyn. Endi olaı emes.
– Endi orta jáne shaǵyn bızneske arnalǵan arnaýly salyq rejimi ońaılatylǵan deklarasııa negizindegi arnaýly salyq rejimi dep atalady. Kiris lımıti – qazirgideı 600 myń aılyq eseptik kórsetkish bolyp saqtalady. Qyzmetkerler sany boıynsha shekteýler alynyp tastalady. Mólsherleme – 4% jáne ony máslıhattar 50%-ǵa deıin tómendetýi múmkin. Úkimet rejimdi tek belgili bir qyzmet túrlerine qoldanýdy usyndy jáne basty shart – tek B2C operasııalary, – dedi S.Jumanǵarın.
Demek jańa júıe – halyqqa tikeleı qyzmet kórsetetin kásipkerlerge (B2C) arnalǵan. Iаǵnı naýbaıhana, tiginshi, dámhana, shashtaraz sııaqty qarapaıym kásip ıelerine bul – úlken múmkindik. Endi burynǵydaı jeti túrli salyq rejimi bolmaıdy, tek úsheýi qalady: ózin-ózi jumyspen qamtyǵandarǵa arnalǵan, ońaılatylǵan deklarasııa negizindegi jáne sharýa qojalyqtaryna arnalǵan.
Biletinderińizdeı, Májiliste Salyq kodeksiniń jańa jobasy birinshi oqylymda maquldandy. Qujattaǵy usynystar az emes – olar eldiń salyq júıesine túbegeıli ózgeris ákelmek. Ulttyq ekonomıka mınıstrligi Salyq jáne keden saıasaty departamenti dırektorynyń orynbasary Nurlybek Shaımahanovtyń aıtýynsha, bul ózgerister el ekonomıkasyna tyń serpin beredi.
– Kásipkerler úshin eń basty jańalyq – arnaýly salyq rejimin qoldanýǵa shekteý bolmaıdy. Buryn tek naqty qyzmet túrlerine ǵana ruqsat etilse, endi tizim qysqaryp, ruqsat etilmeıtin qyzmetter ǵana naqty belgilenedi. Bul – shaǵyn jáne orta bıznes úshin úlken múmkindik. Sonymen qatar arnaýly rejimmen jumys isteıtin kásipkerler qosylǵan qun salyǵyn tólemeı-aq 2,3 mlrd teńgege deıin aınalym jasaı alady. Mınıstrliktiń aldyn ala esepteýinshe, usynylǵan ózgerister el bıýdjetine qosymsha 5 trln teńgege jýyq tabys túsirýi múmkin. Onyń 3 trln-y – qosylǵan qun salyǵyn kóterýdiń nátıjesi. Qalǵan bóligi – salyq jeńildikterin qysqartý, bankterge, qurylys jáne qarjy sektoryna qatysty salyq mólsherlemesin arttyrý, sondaı-aq memlekettik baǵaly qaǵazdardan túsetin tabysqa salyq engizý arqyly jınalmaq, – deıdi ol.
