Maınıng-ferma qalada 2022 jyldan 2024 jyldyń mamyryna deıin jasyryn jumys istegen. Kúmán týdyrmas úshin qozǵaltqyshtardy óńdeý ortalyǵy retinde ashylǵan. Osy aralyqta aıyptalýshylar bir megapolıstiń turǵyn aýdany bir aıda paıdalanatyn elektr energııasyn shyǵyndap úlgergen. Úsh azamatqa qatysty úkim de shyqty. Anyqtalǵandaı, olardyń zańsyz jolmen alǵan sıfrlyq aktıvteri 143 mln teńgeden asady eken.
«Tintý barysynda 1 257 asıkmaıner (sıfrlyq aktıvterdi óndirýge arnalǵan jabdyq), ónerkásiptik salqyndatqysh jeldetkishter men transformatorlyq stansııa alyndy. Sot olardy QR QK 214-babynyń 2-tarmaǵy boıynsha kináli dep tanyp, aıyppul salý jazasyn taǵaıyndady», delingen agenttiktiń habarlamasynda.
Sot sheshimimen memleket paıdasyna 900 mln teńgeden astam múlik, naqtylasaq, «Toyota Camry», «Nissan Juke» kóligimen qosa, maınıng jabdyqtary tárkilengen. Osyǵan qosa, sot aıyptalýshylarǵa qylmystyq tabys mólsheri retinde 143,2 mln teńgeni memleketke qaıtarýdy mindettedi. Úkim zańdy kúshine engen.
