Mektepti úzdik bitirgen, túrli deńgeıdegi pándik olımpıadalarda top jarǵan Bolathan Almatydaǵy memlekettik medısınalyq ınstıtýttyń stýdenti atandy. Kenjesiniń dárigerlikti tańdap, joǵary oqý ornyna túskenine, ásirese, barǵa shúkirshilik etip, qıyndyqqa moıymaı ul-qyzdyń barlyǵyn eńbekqorlyqqa, adaldyqqa baýlyǵan Hansha ana erekshe qýanǵan edi. Jylqy malynyń tilin bilgen, 77 jasqa deıin kókpar tartqan ákesi Salybek óz ómirimen ónege bolyp, isimen úlgi kórsete júrip adal eńbektiń nany tátti bolatynyn sanasyna sińirdi. Ákesin ómirlik ustazy sanaıtyn, Qazyǵurttyń baýraıyndaǵy aýylda ósken, Bolathan joǵary oqý ornynda orys tiline tóselgen qala balasynan qalyspady. Aldyna kelgen adamǵa túsinistikpen qarap, rııasyz kómek beretin, deneni ǵana emes, jandy da emdeıtin dáriger bolýdy maqsat etken Bolathan Salybekuly – búginde óńir turǵyndarynyń alǵysyna bólengen óz isiniń bilikti mamany, densaýlyq salasynyń maıtalmany, uıymdastyrý qabileti joǵary isker basshy. Basqarý isinde Almaty ekonomıkalyq ýnıversıtetin qarjy jáne nesıe mamandyǵy boıynsha bitirip, ekonomıst biliktiligin alýy da oń septigin tıgizip keledi.
Eńbek jolynda Bógen aýdandyq medısına birlestiginde hırýrg-dáriger, bólim meńgerýshisi, Shymkent qalalyq jedel járdem kórsetý aýrýhanasynyń bas dárigeri, oblystyq klınıkalyq aýrýhanasynyń bas dárigeri, Ońtústik týberkýlezge qarsy dıspanseriniń bas dárigeri syndy jaýapty qyzmetterdi abyroıly atqarǵan Bolathan Saǵymbekov alǵash ret operasııaǵa kirgen sátin umytpaıdy.
«Jeti jyl boıy teorııalyq bilim alyp, Almatyda oblystyq aýrýhanada alǵash ret operasııa jasaýǵa qatysqan sol bir kún esimde. О́ıtkeni jaýapty sátte qarapaıym meıirbıkeniń óz mindetin adal da asa uqyptylyqpen atqarǵanyna kýá boldym. Men de operasııanyń qalaı, qandaı aspaptarmen jasalatynyn, ne qoldanylatynyn bilip turmyn, biraq meıirbıkeniń jumysyna tánti boldym. Bul múmkin praktıkalyq turǵyda alǵash alǵan sabaq retinde de este saqtalyp qalǵan bolar. Endi birde aýdandyq aýrýhanada eńbek etip júrgenimde aldyma kelgen naýqas balaǵa dál dıagnoz qoıýǵa feldsherdiń keńesi yqpal etti. Iаǵnı teorııalyq bilim men tájirıbeni ushtastyrý mańyzdy ekenine kóz jetkizdim. Dáriger medısına ǵylymy men tájirıbesi áleminde bolyp jatqan barlyq jańalyq týraly bilip, basqa mamandarmen tájirıbe almasyp turýy kerek. Ibn Sına: «Dárigerdiń úsh qarýy bar: biri – pyshaq, ekinshisi – shóp, úshinshisi – jyly sóz» degen. Osyndaı ıgi qasıetter boıynan tabylatyn dáriger ǵana halyqtyń súıiktisine aınalmaq», deıdi B.Salybekuly.
«Ordabasy aýdandyq ortalyq aýrýhanasy» MKK-niń basshysy Bolathan Saǵymbekov memlekettik, qoǵamdyq qyzmettegi cińirgen eńbegi, eldiń áleýmettik-ekonomıkalyq, mádenı damýyna, halyqtar arasyndaǵy dostyq pen yntymaqtastyqty nyǵaıtýǵa sińirgen eleýli eńbegi úshin «Qurmet» ordenin ıelendi. Kásibine adaldyǵy men joǵary jaýapkershiligi áriptesterine ǵana emes, búkil aýdan turǵyndaryna úlgi. Medısına ǵylymdarynyń kandıdaty, Prezıdenttiń Alǵys haty, «Densaýlyq saqtaý isiniń úzdigi» tósbelgisi, «Ońtústik Qazaqstan oblysyna sińirgen eńbegi úshin» medaliniń ıegeri atanýy da kóp jaıtty ańǵartady. Áriptesteri ony dostyqqa berik, jalǵandyqqa jany qas, kópshil azamat retinde de qurmetteıdi. Ádebı kitaptardy kóp oqıtynyn, uly adamdardyń ómir joly jóninde áńgimeleıtin bolsa, qalamgerlerdiń ózi jańa derekterge qaryq bolyp qalatynyn aıtady.
Bolathan Salybekuly basqaryp otyrǵan aýdandyq ortalyq aýrýhana bıyl zaman talabyna saı jańa medısınalyq qurylǵylarmen jabdyqtaldy. Atap aıtqanda, magnıttik-rezonanstyq tomografııa, stasıonarlyq angıografııa quraldarymen tolyqty. Zamanaýı úlgidegi apparattar dıagnostıkalyq zertteý barysynda dárigerlerge naqty aqparat berý arqyly olardyń jumysyn jeńildetip, dıagnozdy anyqtaýǵa kómektesedi. Magnıttik-rezonanstyq tomografııa, kompıýterlik tomografııa Ordabasy, Báıdibek aýdandary men Arys qalasynyń turǵyndaryna júıke júıesi aýrýlary, tirek-qımyl apparattary, taǵy birqatar ishki qurylys aýrýlaryn dıagnostıkalaýda qoldanylyp jatyr. Búginde ozyq úlgidegi jabdyqtardyń kómegimen naýqastarǵa shuǵyl, josparly túrde jasalyp jatqan kardıologııalyq, nevrologııalyq, hırýrgııalyq operasııalar sátti aıaqtalyp keledi. Turǵyndar aýdan deńgeıinde tıisti medısınalyq kómek alý múmkindigine ıe. Sondaı-aq jasyl jelekke oranǵan, qyzyldy-jasyldy gúldermen kómkerilgen, sanańa aqyl quıar naqyl sózder ilingen aýrýhana aýlasyna kópshilik rıza. Bul kórinis aýrýy janyna batqan naýqastardyń kóńiline jubanysh, sezimine qýanysh syılaıdy. Aýrýhana ujymynyń yntymaǵy, birligi, tártibi óz isterine jaýapkershiligi de jurtty súısindiredi.
Túrkistan oblysy
