Jylyna mıllıon tonnaǵa deıin áktas, 200 myń tonna shaǵyl óndirýge áleýeti jetetin kásiporynda mansabyn qatardaǵy jumysshy bolyp bastap, qyzmette satylaı ósken maıtalmandar az emes. Solardyń biri, ilgeride aýyr jumystyń mehnatyn sezingen Nıkolaı Sozykın qazir munda karer basshysy retinde eńbek etip, jumysty úılestirip júr.
«Birinshi kezekte árbir adam óz jumysyn jaqsy kórgeni abzal. Sonda ǵana kóńil kónshitetindeı nátıjege qol jetkizýge bolady. Qordaıdyń maıda qońyr jeline kekilin taratyp ósken azamattar úshin óndiriste ter tókkennen bólek, qoınaýyna san túrli qupııa búkken saıyn dalanyń kóz toımas tabıǵatyn tamashalaýdyń ózi jandy rahatqa bóleıdi. Baıtaq dalamyzda qazba baılyq az emes. Osyndaı keremet jerde ǵumyr keshý, eńbek etý – túsingenge baq. Jumys kúni tań bozynan bastalyp, kesh aıaqtalsa da, tynymsyz eńbek etý, ter tógý – abyroıly mindet. Ala tańnan qajetti qondyrǵylar men tas usaqtaǵysh quraldar iske qosylǵan kezde karer jumysy jandanady. Mundaǵy burǵylaý, shıkizat sapasyn baǵalaý, jarylys jumysy kez kelgen jumysshydan qyraǵylyqty, saqtyqty, eptilikti talap etedi. Qaı kezde de ár iske asa muqııat bolǵan jón. Sondyqtan da bizdiń jumystyń jaýapkershiligi zor», deıdi ol.
«Aqtas» JShS Qordaı aýdany aýmaǵynda uzaq jyl boıy tabysty jumys istep jatqan kásiporyn sanatynda. 1998 jyly irgesi qalanǵan seriktestik basshylary sol kezeńdegi barlyq qıyndyqty judyryqtaı jumyla júrip eńserdi. Táýelsizdiktiń synǵa toly alǵashqy jyldarynda jumysshylar da túrli qıyndyqty bastan ótkerdi. Degenmen olar da mamandyqqa adaldyq tanytty.
«Meniń búkil sanaly ǵumyrym osy jumyspen bite qaınasyp ketken. Kez kelgen istiń ózine tán qıyndyǵy bolady. Adal eńbekpen tapqan nápaqanyń jóni bólek. Mundaǵy karer – tek qana jumys ornym emes, otbasym, ómir mektebine aınalyp ketken qutty ordam. Kez kelgen jumysshy atqarǵan isine adal bolsa, jyldar óte kele tabysqa qol jetkizedi. Árbir jas osyny umytpasa eken», deıdi Nıkolaı Sozykın.
Resmı derekke júginsek, karer men taıaý mańdaǵy bólimshelerdegi kásiporynǵa tıesili qor áli eki júz jylǵa jetedi. Qazirgi kezde «Aqtas» JShS-ge qarasty kásiporynda 120 adam turaqty jumyspen qamtylǵan.
«Bıyl elimizde «Jumysshy mamandyqtary jyly» dep jarııalanǵanyna qýanyshtymyz. Jaıshylyqta atqarǵan eńbegi qaltarysta qalyp kete beretin óndiris, ónerkásip salasy mamandarynyń atqarǵan jumysy qazirdiń ózinde aıtarlyqtaı elenip jatyr. Bul bizdi shabyttandyrady. Jalpy alǵanda, áktas pen shaǵal óndirý isiniń ózine tán qıyndyǵy jetkilikti. Munda tek sol eńbektiń mehnatyna tóze alatyn erjúrek azamattar ǵana jumys isteıdi. Bizdiń kásiporyn áý bastan qaldyqsyz óndiris qaǵıdasyn ustandy. Sement óndirisinde áktas, alıýmınat, temir syndy shıkizattyń barlyǵy derlik paıdalanylady», deıdi N.Sozykın.
Jıyrma jyl boıy úzdiksiz eńbek etip kele jatqan Nıkolaıdy ujymdaǵy jańa býyn qyzmetkerler ustaz sanaıdy. Jas mamandar sabyrly qalpy men kásibı biliktiligi úshin syılaıdy, qurmetteıdi. О́z kezeginde ol jınaǵan tájirıbesin keıingi býyn áriptesterimen bólisýden jalyqpaıdy.
«Kez kelgen jumys tájirıbeni talap etedi. Sondyqtan ujymǵa kelgen azamattarǵa bilgenimizdi úıretýden jalyqpaımyz. Eń qýanyshtysy, bizde ter tógip júrgen azamattar jumysty aýyrsynbaıdy. Olar qol kúshin qajet etetin eńbekten eshqashan qashqan emes. Qyzmetkerler mundaǵy jumysty ómir sabaǵy dep túsinedi. Olardyń boıynan qaı kezde de jańashyldyqqa beıim ekenin ańǵarý qıyn emes», deıdi Nıkolaı.
Seriktestikte taban aýdarmaı eńbek etip kele jatqan N.Sozykın qarapaıym jumysshydan karer basshysy laýazymyna jetkenge deıin túrli qıyndyqty eńserdi. Eńbekqorlyǵy men tózimdiliginiń, kásibıliginiń arqasynda óz isin jetik meńgergen mamannyń júrip ótken joly jańa býyn áriptesterine úlgi.
Jambyl oblysy,
Qordaı aýdany
