Abaı óńirlik garnızonynyń baspasóz qyzmetiniń málimetinshe, elimizdiń alǵashqy ulttyq bitimgerlik kontıngenti ótken 2024 jyly naýryz aıynda BUU mıssııasy aıasynda Golan jotalaryna jiberilgen edi. Onda áskerı qyzmetshiler mobıldi patrýldeý, baqylaý beketterin kúsheıtý, evakýasııa jáne mınasyzdandyrý jumystaryn atqarǵan. Búgin, mine, sol bitimgerlik quram sapynda tabysty qyzmet atqaryp, halyqaralyq qaýipsizdikti nyǵaıtýǵa zor úles qosqan ofıserler men sarbazdar aman-esen elge oralyp otyr», deıdi.
Áýejaıǵa jaqyndaryn kútip alýǵa jınalǵan otbasy músheleriniń kóńilinde erekshe tolqý boldy. Solardyń biri – 3 synypty serjant Qanat Ibraevtyń zaıyby Jansaıa Hamzaeva.
«Qazirgi kóńil-kúıimizdi sózben aıtyp jetkizý qıyn. Júregimiz dúrsildep tur. Bitimgerler Astanaǵa jetti degen habardy estigeli beri qýanyshymyzda shek joq. Jubaılarymyzdyń halyqaralyq beıbitshilik pen turaqtylyqty saqtaý jónindegi mańyzdy mindetterdi atqaryp kelgenin biz de maqtanysh tutamyz. Barsha áskerı qyzmetshilerdiń otbasylaryna amandyq tileımin», dep aǵynan jaryldy ol.
«Shyǵys» óńirlik qolbasshylyǵy áskerleriniń qolbasshysy polkovnık Jeńis Maralov mindetterin minsiz oryndap kelgen bitimgerlerdi mıssııanyń sátti aıaqtalýymen jáne týǵan elge aman-esen oralýymen quttyqtap, BUU mandaty sheńberinde tapsyrmalardy oryndaý kezinde kórsetken joǵary kásibıligi men batyldyǵyn baǵalady.
Bitimgerlik mıssııasy quramynda qyzmet etý – bul úlken tájirıbe, ári jaýapkershilik. Alǵa qoıylǵan mindetterdi oıdaǵydaı oryndaǵany úshin qazaqstandyq bitimgerlik kontıngenttiń jeke quramy BUU Mıssııasy men Hatshylyǵy basshylyǵynyń joǵary baǵasyna ıe boldy.
Áskerı boryshyn úlgili atqarǵany, BUU-nyń Golan jotalaryndaǵy bitimgershilik mıssııasyn júzege asyrý barysynda kórsetken erligi men janqııarlyǵy úshin el Prezıdenti birqatar áskerı qyzmetshilerdi marapattady. Solardyń biri 44736 áskerı bólimi barlaý-shabýyldaý (arnaıy maqsattaǵy) rotasynyń komandıri maıor Esen Sabyrjanov. Áskerı qyzmetker júktelgen jaýapty mindetti joǵary deńgeıde atqarǵany úshin Baýyrjan Momyshuly atyndaǵy II dárejeli «Aıbyn» ordenimen marapattaldy.
«Alǵashqy bitimgerlik kontıngentimiz Golan jotalaryna 600-den astam áskerı tapsyrmalardy oryndady. Bir jyldan astam ýaqytta áskerı qyzmetkerler ózderin óte joǵary deńgeıde kórsetti. Áskerı qyzmetkerler biliktilikteriniń arqasynda qoıylǵan tapsyrmalardy abyroımen oryndap shyqty», dedi maıor Esen Sabyrjanov.
