Sýretti túsirgen – Jumabaı MUSABEKOV
Búginde oblystyń áleýmettik-ekonomıkalyq damý kórsetkishi artyp, aýyldy aımaqtarǵa kóbirek kóńil bóline bastady. Bul Memleket basshysynyń «Qýatty aımaqtar – qýatty memleket» tujyrymdamasynyń bir baǵyty retindegi mańyzdy qadamy. Mysaly, oblys qurylǵanǵa deıin Jetisý óńirinde nebári 5 eldi meken gazdandyrdyrylǵan bolsa, búginde qosymsha 58 aýylǵa gaz jetkizildi. Osylaısha, 63 eldi mekenge gaz tartyldy, onyń 30-y kógildir otynǵa ótken jyly qol jetkizgen.
«Oblysymyzda ortalyqtandyrylǵan sýmen qamtamasyz etý deńgeıi 91,35%-ǵa jetip, byltyr sý júıesine 2 aýyl qosyldy. 298 km jeli jóndeldi, 17 eldi mekende aýyzsýdyń sapasy jaqsardy. «Aýyldyq densaýlyq saqtaýdy jańǵyrtý» Ulttyq jobasy aıasynda 23 jańa medısınalyq nysan boı kóterdi. Sport salasynda 18 nysan iske qosylyp, 10 blok-modýldi sport kesheni ornatyldy. Oblystyq mańyzy bar 193 shaqyrym jol men 54 eldi mekenniń ishki kósheleri jóndeldi», deıdi oblystyq máslıhattyń tóraǵasy Gúlnár Qojaǵulqyzy.
Gazdandyrý – Prezıdenttiń tapsyrmasyna saı oblys basshylyǵy erekshe mán berip otyrǵan basym baǵyttardyń biri. Soǵan sáıkes, gazdandyrý deńgeıi 27%-ǵa artyp, 56,5%-ǵa jetken. Oblys ákimi baspasóz qyzmetiniń málimetinshe, jyl sońyna deıin óńirde gazdandyrý deńgeıi 71,4% bolmaq. Panfılov aýdanyn qosa alǵanda, Kerbulaq aýdanynan Taldyqorǵanǵa deıingi 500 myńnan astam halqy bar 126 eldi meken gazǵa qol jetkizedi.
2024 jyldyń tamyzynda «Taldyqorǵan–Úsharal» magıstraldy gaz qubyrynyń qurylysy bastalǵan. Bul jobany iske asyrýdyń nátıjesinde Alakól, Aqsý, Sarqan aýdandarynyń 66 eldi mekeni gazben qamtamasyz etilmek. О́ńirdi tabıǵı gazben qosymsha qamtamasyz etý úshin «Almaty–Taldyqorǵan» lýpıngisiniń (ekinshi tarmaǵynyń) qurylysyn salýǵa qatysty daıyndyq júrgizilip jatyr. Gazdandyrý isi barysynda 1 800-deı turaqty jáne ýaqytsha jumys oryndary ashylǵan.
Bıyl Eskeldi aýdany tolyqtaı gazben qamtylady. Onda keıingi eki jylda 39 myńnan astam turǵynnyń kógildir otynǵa qol jetkizýine múmkindik jasalǵan, ıaǵnı gazdandyrylýǵa jatatyn 21 eldi mekenniń 12-sine gaz qubyry tartylǵan.
«7 eldi mekende – Kókjazyq, Terekti, Qaratal, Abaı, Shymyr, Jastar, Aqtasty aýyldarynda gaz taratý jelilerin salý jumystary júrgizilip jatyr. Onyń ishinde 5 eldi mekenniń jumystary bitip, halyq ıgiligin kórip otyr. Kókjazyq, Terekti aýyldarynda bıyl aıaqtalady», dedi oblys basshysy Beıbit Isabaev.
Oǵan qosa Qaınarly men Jalǵyzaǵash aýyldaryna gaz tartýǵa respýblıkalyq bıýdjetke ótinim usynylǵan. Sonyń nátıjesinde jyl aıaǵyna deıin jalpy sany 48 myń adam turatyn 21 eldi meken gazǵa tolyq qol jetkizedi.
Qabyldanǵan sharalardyń nátıjesinde básekelestik ortany damytý arqyly gaz qostyrý qunyn, qazandyq pen qajetti jıyntyqtardy qospaǵanda, 170-175 myń teńgege deıin tómendetýge múmkindik týdy. Sonymen qatar bir jarym jyldyń ishinde 1 600 gaz qazandyǵyn satyp alýǵa 500 mln teńge bólingen. Turǵyndarǵa qazandyqtyń tólemin 10 aıǵa deıin bólip tóleýge jeńildik jasalyp otyr.
«Aýdanda barlyǵy 63 eldi meken bar, onyń 26-sy gazdandyrýǵa jatady. Saryózek aýyly turǵyndarynyń 34,8%-y gazǵa qosylǵan. Turǵyndardy kógildir otynmen qamtamasyz etý maqsatynda Saryózek aýylyna gaz qubyrlary tartylyp, 3 102 úıdi kógildir otynmen qamtý múmkindigi bar. Barlyǵy 1 080 turǵyny bar kópqabatty úı gazǵa qosylyp, 984 úıdi gazǵa qosý boıynsha tehnıkalyq shart berilgen. Aýylda 29 gaz taratý shkafy ornatylǵan, onyń 9-y kommersııalyq, 17-si abonentterdiń paıdalanylýynda», deıdi Kerbulaq aýdanynyń ákimi Qanat Esbolatov.
Jalpy, 2029 jylǵa qaraı Jetisý oblysynda gazdandyrýǵa jatatyn 192 eldi mekenge tolyqtaı gaz tartylady. Sonyń nátıjesinde 624 myńnan astam turǵyn nemese óńir halqynyń 91%-y kógildir otynǵa qol jetkize alady.
Taldyqorǵan halqynyń 90,3%-y gazǵa qosylýǵa múmkindik alǵan, sonyń 69%-y nemese 37,8 myń abonent gaz qostyrǵan. Ortalyqtandyrylǵan aýyzsýmen qamtý deńgeıi 98%-dy qurap otyr. Yntymaq aýyly, 3-bólimshe, «Prıgorodnyı», «Ekspedısııa», «Úıtas» saıajaı alaby, «Jastar-2» shaǵyn aýdany, Yntymaq turǵyn alaby men Moınaq aýyly kógildir otynmen qamtamasyz etilgen.
«Qala mańyndaǵy «Almaly», «Ashybulaq», «Merekelik», «Qyzyltas», «Balyqty», «Qaratal» saıajaılary men 1-bólimshege gaz tartýdyń jobalyq-smetalyq qujattamasy daıyndalyp jatyr, kelesi jyly qurylysyn bastaımyz. Aýyzsýǵa kelsek, ortalyq sý júıesine qosý deńgeıi qazir 98%. Kelesi jyly Yntymaq turǵyn aýdanynda káriz júıesiniń qurylysyn aıaqtaımyz. Sondaı-aq Erkin aýyly men 1-bólimshede sýmen qamtý júıesin sala bastaımyz», deıdi oblys basshysy.
Jetisý oblysy
