Kezdesýge kelgen qonaqtardyń árqaısysy – qazaq jýrnalıstıkasy men joǵary bilim salasyna eńbek sińirip júrgen azamattar. Olardyń arasynda akademıkter Baýyrjan Omaruly, Kárimbek Qurmanálıev jáne ózge áriptesteri men shákirtteri boldy.
Jıynda belgili jazýshy, fakýltet dekany, dosent Nurjan Qýantaıuly júrgizdi. Alqaly toptyń ortasynan alǵash sóz Baýyrjan Omarulyna berildi.
«Ulttyq jýrnalıstıka desek, eń aldymen oıymyzǵa jýrnalıstıka fakýlteti keledi. Al sol fakýltetti qalyptastyrǵan, onyń irgesin qalaǵan Qaıyrjan Bekhojın, Taýman Amandosov, Temirbek Qojakeev syndy tulǵalar. Bul – úshtaǵan ispetti temirqazyqtar. Sol ustazdardyń jolyn jalǵap, olardyń shákirtteri de ult jýrnalıstıkasyna ólsheýsiz úles qosty. Solardyń biri – Namazaly Omashuly. Ol kisiniń esimi ult jýrnalıstıkasy tarıhyna altyn árippen jazyldy. Qazaqstandaǵy eki iri fakýltetti basqaryp, biriniń dástúrin jalǵastyryp, ekinshisiniń negizin qalaǵany – úlken eńbek, zor qaıratkerlik», dedi kósemsózshi-ǵalym.
Al jıynnyń basty qonaǵy Namazaly Omashuly bolsa «búgingi júzdesý – Jýrnalıstıka jáne saıasattaný fakýltetiniń qurylǵanyna 15 jyl tolýyna oraı uıymdastyrylyp otyrǵan taǵylymdy kezdesý» dep, fakýltettiń ótkeni men búgini, kásibı jýrnalıstıka biliminiń qalyptasýy týraly áńgimeledi.
«Jýrnalıstıka – ózge mamandyqtarǵa uqsamaıtyn, ómirmen bite qaınasqan, halyqqa tikeleı qyzmet etetin sala. Búgingi kúni el ishinde bul mamandyqtyń bedeli artyp kele jatqany kóńil qýantady. Biraq osy dárejege jetý joly ońaı bolǵan joq. 2009 jyly elimizde jýrnalıstıka máselelerin zertteıtin alǵashqy ınstıtýt quryldy. Al 2010 jyldyń 5 mamyrynda resmı túrde L.N. Gýmılev atyndaǵy Eýrazııa ulttyq ýnıversıtetinde Jýrnalıstıka jáne saıasattaný fakýlteti ashyldy. Ýnıversıtet basshylyǵynyń shaqyrýymen men osy fakýltetti qurýǵa atsalystym. Buǵan deıin de munda jýrnalıstıka salasy kafedra ne mamandyq retinde oqytylǵany belgili. Alaıda derbes fakýltet retinde qurylýy kásibı bilim berýdiń jańa kezeńi boldy. Bul – elordadaǵy kásibı jýrnalıst daıarlaıtyn alǵashqy ortalyq bolatyn, dedi N.Omashuly.
Professordyń paıymdaýynsha, elimizde jýrnalıstıka fakýltetiniń tarıhy sonaý 1934 jyldan bastalady. Sol jyly Qazaq memlekettik ýnıversıteti ashylyp, Kommýnıstik jýrnalıstıka ınstıtýty da óz jumysyn bastaǵan edi. Bul – jýrnalıstıka mamandyǵynyń derbes bilim berý júıesine engeniniń aıǵaǵy. Sol kezeńde dáris oqyp, emtıhan alǵandardyń qatarynda Sáken Seıfýllın syndy tulǵalar bolǵanyn atap ótken jón.
Osylaısha, otyrys resmı sıpattan góri, erkin áńgimege, ómirlik tájirıbemen bólisýge, ustaz ben shákirt arasyndaǵy rýhanı baılanysty tereńdetýge baǵyttaldy. Ýnıversıtet basshylyǵy tarapynan aldaǵy ýaqytta bul kezdesýdi aýqymdy ǵylymı konferensııaǵa ulastyrý josparlanyp otyrǵany aıtyldy.
«Jýrnalıstıka fakýltetiniń 15 jyldyǵy qarsańynda Namazaly Omashulyna arnap konferensııa, halyqaralyq forým deńgeıinde resmı is-shara ótkizýimiz kerek. Al biz óz tarapymyzdan oǵan tolyq qoldaý kórsetetin bolamyz», dedi EUÝ ýnıversıtettiń akademııalyq máseleler jónindegi prorektory Ardaq Beısenbaı.
«Biz sózge erekshe mán beretin, sóıleý men jazý mádenıetin joǵary qoıatyn elmiz. Qazirgi medıakeńistikte «sulýlyq úshin sóıleý», jaltyraǵan sózben ǵana alysqa bara almaısyń. Oqyrmandy oılandyratyn, selt etkizetin, shynaıy, tiri sóz qajet. Jýrnalıstıka – aqyldy adamǵa arnalǵan kásip. Bul salada jańalyq qana emes, jańalyqtyń astaryn ashatyn, tyńdaýshy men oqyrmannyń tanym kókjıegin keńeıtetin tereń mazmundy dúnıeler mańyzdy. Buryn biz baıandaý, sýretteý syndy janrlarǵa kóbirek den qoıatynbyz. Al damyǵan elderdiń tájirıbesine qarasaq, olar naqty oqıǵanyń astaryna úńilýge, máseleni qoǵamdyq turǵyda tereń saralaýǵa basymdyq beredi», dep jastarǵa aqylyn da aıtty N.Omashuly.
