Alaıaqtyqpen kúres kúsheıdi

Jambyl oblysynyń prokýrory Nurǵalym Ábdirovtiń tóraǵalyǵymen quqyq qorǵaý organdarynyń, jergilikti atqa­rýshy bılik ókilderiniń jáne qarjy naryǵy sýbektileri­niń qatysýymen ınternet-alaıaqtyqpen kúres jóninde alqa otyrysy ótti. Basqosý barysynda alaıaqtyqpen kúres jumysyn kúsheıtý máselesi, pro­kýratýranyń bastamasy­men qurylǵan «Cyberpol» vedomstvo­­­­aralyq tobynyń jáne «CyberShekteuTaraz» telegramm-boty jumysynyń mejeli mer­zimdegi nátıjeleri qaraldy.

Oblys prokýrorynyń aıtýynsha, byltyr birlesip qolǵa alǵan jumys nátıjesinde qylmysty ashý kórsetkishi 33 paıyzǵa artqan. Sondaı-aq Ulttyq bank­tiń «Antifrod-Center» ortalyǵy arqyly 346 kúdiktiniń bank shottary buǵattalǵan. Baılanys operatorlarymen jasalǵan memorandým arqyly qashyqtan qońyraý shalý múmkindigin týdy­ratyn 2 «Sim-box» quraly anyqtalǵan.

Oblystyq prokýratýranyń uıytqy bolýymen polısııa qyzmetkerleri «Qazaqtelekom» jáne «Kcell» AQ-men birlesip jedel-izdestirý jumysyn qolǵa alǵan. Nátıjesinde, aqpan aıynda ınternet-alaıaqtyqpen aınalysý úshin «Tele-2» operatorynyń 128 sım-kartasy salynǵan «Sim-box» quraly anyqtalypty. Sondaı-aq bul derek boıynsha Reseı azamaty ustalǵan. Buǵan qosa «CyberShekteuTaraz» botynyń kómegimen 224 kúmándi siltemeler, jarnama, veb saıttar, telefon nómirleri buǵattalǵan.

Jalpy alǵanda, ınternet-alaıaq­tyqpen kúres jumysy quzyr­ly organdar tarapynan ilki sátke de toqtaǵan emes. Jyl basynda oblystyq prokýratýranyń muryndyq bolýymen oblystyq polısııa departamentiniń qyz­met­kerleri 150 azamatqa qatysty alaıaqtyq jasap, 80 mln shamasynda shyǵyn keltirgen el azamatyn kúdikti retinde quryq­taǵan. Sonymen qatar oblys prokýrory alaıaqtyqpen baılanysty qylmystyń 76 deregin teris baǵalap otyr. Polısııa qyzmetkerlerine qatysty qyl­mystyq ister de tirkelgen.

Jıyn barysynda ınternet alaıaqtyqtyń aldyn alý maq­sa­tynda kompıýterlik tehnologııa jáne krıptovalıýta sala­syn­daǵy mamandardy tartý qajet­tiligi zerdelendi. Naqty derekke súıensek, shottardy ýaqtyly buǵattamaı, belgilengen talaptardy buzyp, nesıe bergeni úshin 3 qarjy uıymynyń ju­mys­shy­la­ryna qatysty nem­quraı­dylyq deregi boıynsha sotqa deıinge tergep-tekserý júrgizilip jatyr eken.

Alqa otyrysynda alaıaqtyqpen birlesip kúresýdiń mańyzdylyǵy jan-jaqty talqylandy. Sondaı-aq ınternet-alaıaqtyqpen kúresý sharalaryn kúsheıtý boıynsha naqty nusqaýlar berildi.

Taraz