Buǵan 2025 jylǵy 18 sáýirde kúshine engen Qazaqstan Respýblıkasynyń Ishki ister mınıstrligi men Syrtqy ister mınıstrliginiń buıryǵy múmkindikti bermek. Bul qujat “Qazaqstan Respýblıkasynda ýaqytsha bolatyn sheteldikterge jáne azamattyǵy joq adamdarǵa jeke sáıkestendirý nómirin qalyptastyrý jáne túzetý" pılottyq jobany iske asyrady.
Biryńǵaı tańbalaý jáne qadaǵalaý operatorynyń dárilik zattardy tańbalaý jobasynyń jetekshisi Anar Káribaevanyń aıtýynsha, búginde Qazaqstanda 28 elden kelgen shamamen 130 sheteldik óndirýshi kompanııanyń dári-dármekteri satylýda.
«Joba aıasynda shetel azamattary «Taýarlardy tańbalaý jáne qadaǵalaý» aqparattyq júıesinde jumys isteý úshin qajet JSN-dy jyldam ári ońaı ala alady. Bul bastamanyń mańyzdy bóligi – JSN-dy Qazaqstannan tys jerde alý múmkindigi. Bul sheteldik kompanııalar úshin jaǵdaıdy jeńildetip, Qazaqstan naryǵyna shyǵý prosesin jyldamdatady», – dedi Anar Káribaeva.
Pılottyq joba Qazaqstanda dári-dármek óndirýmen jáne/nemese ımporttaýmen aınalysatyn sheteldik azamattar úshin ákimshilik prosesterdi jeńildetý men jańǵyrtý maqsatynda qolǵa alyndy. Ol memlekettik organdarmen ózara árekettesý, bıznes tirkeý jáne basqa da ákimshilik rásimder úshin qajet JSN-dy jedel alýǵa múmkindik beredi. Atalǵan joby osy jyldyń sońyna deıin qoldanysta bolady.
