Mundaı dıagnoz kez kelgen adam úshin aýyr jaǵdaı ekeni anyq, al ǵasyr jasaǵan ájeı úshin bul – ómir men ólim arasyndaǵy oqıǵa ekendigi aıan. Alaıda, altyn qoldy dárigerler bul synaqtan qaımyqpaı, naýqas aýrýhanaǵa jetkizilgen kúni-aq oǵan shuǵyl túrde jabyq repozısııa jáne osteosıntez ádisi arqyly «Gamma» tıpti ıntramedýllıarlyq shtıftpen jambas súıegin bekitý otasy jasaldy. Bar bolǵany 30 mınýtqa sozylǵan bul kúrdeli ota sátti aıaqtaldy.
Kúrdeli ota Travmatologııa jáne ortopedııa bólimshesiniń meńgerýshisi Medet Janysovtyń jetekshiligimen jasalyp, assıstent Islambek Nurmahashev, anestezıolog Álibek Satybaldıev pen otalyq medbıke Ásel Abylǵazınova hırýrgııalyq aralsýdyń sátti ótýine atsalysty Kásibı sheberlik pen komandalyq úılesimdi jumystyń arqasynda Marııa ájeı birneshe kúnniń ishinde baldaqqa súıenip, qozǵala bastady.
Jetinshi kúni onyń jaǵdaıy qanaǵattanarlyq dep baǵalanyp, ambýlatorııalyq em alý úshin úıine shyǵaryldy.
«Júz jas – úlken beles. Osyndaı jasqa kelgen adamnyń qaıta júrip ketkenin kórý – biz úshin zor mártebe. Bul – ýaqtyly kórsetilgen medısınalyq kómektiń, zamanaýı tásil men eń bastysy, naýqastyń ómirge degen qulshynysynyń jemisi», deıdi bólimshe meńgerýshisi Medet Janysov.
Al Marııa ájeı óz isiniń maıtalmandaryna aınalǵan mamandarǵa óz alǵysy men aq batasyn berip otyr.
