Foto: Ashyq derekkóz
Aq úı bul máselege qatysty AQSh-tyń Salyq qyzmetine júginip, Garvardty salyqtyq jeńildikten aıyrýdy suraǵan.
Naýryz aıynda Ádilet mınıstrligi ýnıversıtettiń barlyq federaldy kelisimsharttary men úkimet qarjylandyratyn granttaryna keshendi sholý bastaǵan. Al ótken aptada Ishki qaýipsizdik mınıstrligi Garvardqa arnalǵan 2,7 mıllıon dollar kólemindegi granttardy toqtatqan.
Tramp bul máselege baılanysty óziniń Truth Social jelisindegi paraqshasynda málimdeme jasady.
«Garvard baǵytynan taıǵan, ol federaldy qarjylandyrýǵa laıyq emes. Olar tek solshyl radıkaldy, aqylsyz jáne «bosbelbeý» adamdardy jumysqa alady. Bul mekeme stýdentter men bolashaq kóshbasshylarǵa tek sátsizdikti úıretedi. Garvard – kúlkige qalǵan, jekkórýshilik pen aqymaqtyqqa tárbıeleıtin oryn. Ol endi álemniń úzdik ýnıversıtetteriniń tizimine kirýge tıis emes», dedi Tramp.
Ýnıversıtettiń memlekettik basqarý salasy boıynsha professory Raıan Enos bul pikirge qarsy shyǵyp, Garvardtyń federaldy úkimetke baǵynbaýyn qoldaıtynyn aıtqan.
«Úkimettiń jeke mekemege ishki isteri boıynsha ne isteý kerektigin aıtýǵa quqyǵy joq. Adamdar óz pikirin bildirýge jáne kez kelgen nársege qarsy shyǵýǵa quqyly. Eger bul ekeýin shatastyrsaq, sóz bostandyǵyna qaýip tóndiremiz», dedi professor.
Aıta keteıik, buǵan deıin Garvard federaldy úkimetke baǵynýdan bas tartqan alǵashqy ýnıversıtet bolǵan. Endi oqý ornyna bólinetin 2,2 mıllıard dollar kólemindegi granttar toqtatylýy múmkin.
